Willemstad – Pa 2018 a haci un esfuerso grandi pa logra un presupuesto balansa, pero e problematica presupuestario di mas aña di Corsou ta sigui ta motibo di preocupacion. Pais Corsou ainda no tin su maneho financiero na ordo. P’esey Cft a haci palabracion cu Gobierno tocante con pa logra finansa publico sostenibel.
A base di e documentonan entrega door di Corsou (modificacion di presupuesto y reportahe di ehecucion) Cft a determina previamente cu e presupuesto di 2018 no tabata cumpli mas cu e normanan di Ley di Reino tocante supervision financiero. Den cuadro di un trayecto di tende tur dos parti Ministro di Finansa a presenta medida adicional y informacion nobo. Sinembargo, Cft a conclui cu ainda ta existi incertidumbre encuanto e demanda contra empresa estatal UTS y e riesgonan rond di di Sehos y HNO y cu –di manera mas general- cu medida ad hoc no por soluciona e problematica financiero structural di Pais Corsou.
Un condicion importante pa esey ta pone e maneho financiero na ordo y manten’e na ordo. Sin un debido maneho financiero un proceso presupuestario ordena no ta posibel. E criterio (definitivo) ta aprobacion na tempo di e cuenta anual cu un declaracion aprobatorio di accountant. A palabra cu Gobierno di Corsou ta garantisa cu esey lo ta e caso cu e cuenta anual di 2021. Pa e siguiente dos añanan lo elabora y fiha un mapa di ruta (roadmap). Ta haci su ehecucion posibel door di fortalecemento rapido y drastico di e columna financiero di e aparato gubernamental. Tambe a haci palabracion tocante un miho cobramento y recaudacion di impuesto y tocante reforma fiscal.
Raymond Gradus, presidente di Cft: “Fortalecemento di economia di Corsou ta rekeri principalmente inversion priva. E inversionistanan priva kier limita nan riesgonan y por confia riba stabilidad y calidad di e aparato publico gubernamental y administrativo. Un condicion necesario pa esey ta un debido maneho di finansa publico.” Tocante e palabracionnan haci e ta bisa: “Awor ta keda na Gobierno pa ehecut’e di forma dicidido y energico. Como Cft nos lo sigui esaki masha criticamente.” Cft lo informa Conseho di Ministro di Reino tocante e medidanan adopta pa Gobierno y tocante e palabracionnan haci cu Cft.
Durante su bishita na Corsou Cft a papia cu Gobernador, Conseho di Ministro, Ministro di Finansa, e Comision Financiero di Parlamento, e director ministerial y supervisor di Hospital Nobo, e directiva di Banco Central y e directiva di refineria. Tabata e prome bishita di e miembronan nobo di Cft Henk Kamp na nomber di Hulanda y Russell Voges na nomber di Sint Maarten. Ademas di nan, presidente Raymond Gradus y Gregory Damoen na nomber di Corsou ta forma parti di Colegio.