Parlamentario Endy Croes ta sigui señala cu e desaster cu fraude di tereno ta grandi. Cada dia ta dal den mas file unda por prueba cu Benny Sevinger y su “clan” di amigo a horta e pida baranca aki sin misericordia. Tur esaki den dia cla y den cara di Mike Eman kende a tolera tur e robonan aki. Mesun modus operandi practica pa Benny. Con esaki tabata bay? Chief of Staff un tal Every e tempo aya ta un di esnan cu ta identifica e terenonan y ta manda informacionnan door pa e “clan” cu mester lobby cerca Venezolanonan y ehecuta e plan. Asina por ehempel un tal Leoncita ta ricibi un email di e Every kende ta traha den kantoor di Benny y ta bis’e “Leoncita esakinan ta e lotnan na Barcadera, lot number X ta esun mas mihor”. E tal Leoncita mesora ta activa y ta usa su stroman. Asina ta core lanta un NV pa pidi un tereno comercial como optie. Carta ta bay pa Benny y tin evidencianan cla y raspa por ehempel Dashuan NV (di Leoncita) pero cu stroman Winterdal ta pidi 5000 m2 y Benny ta firma esaki riba un fecha promer cu e carta mes a wordo traha. Pues e carta ta data 20 di augustus pero por tuma nota cu e carta tin stempel di Benny su oficina cu un fecha di 7 di augustus como ingekomen stuk y 14 di augustus Benny ta firma esaki y ta aprob’e pues 6 dia promer cu e carta a wordo traha. Aki por prueba ‘valsheid in geschrifte’. Como Minister bo mester por sa mihor pero e “haragannan” pa placa a pone nan comete erornan cu lo persigui nan. E NV no tabata ni existi ainda na e momento ey y ta ricibi e optie di Benny. Ta manda un carta pa Minister pidiendo e bendicion pa traspasa e sharesnan di NV unda automaticamente e optie riba e tereno a bay cu e NV y akinan ta unda ta bende e sharesnan pa miyones pa cristalisa e deal. Esaki a tuma lugar y placa a ‘hit account’ di un tal Leoncita na Merca. Pues tuma un patrimonio di pueblo na prijs di baca flaco pagando Afl. 5000 y ta bendenan entre 2 y 3.5 miyon dollar. Benny su primo tambe ta pata pata hinca den e negoshinan aki. Pues pueblo ta exigi di OM pa acelera e investigacionnan cu ta andando pa asina esnan cu a faya paga pa nan erornan. Na Corsou nos a mira con OM a trata politiconan corupto cu man duro, na Brazil nos por mira con Ministerio Publico a actua contra un ex presidente, na Peru nos a tuma nota recien con Ministerio Publico a baha pisa riba un ex gobernante, wel aki na Aruba e NO por ta otro y ta exigi di OM pa nan traha 24/7 pa por duna resultado mereci. No por ta asina cu bo ta comete fraude, corumpi un pais y bo ta cana liber burlando di OM y gritando den Parlamento ‘I don’t give a damn’. E bala ta lorando pero ta tempo pa acelera e proceso pasobra pueblo kier wak husticia, Croes ta termina bisando.