Minister encarga cu Infrastructura Otmar Oduber den nomber di Gobierno di Aruba a anuncia den un rueda di prensa, e restauracion y renobacion di edificio Uncle Louis Store na San Nicolas. E anuncio aki ta bin despues di hopi aña di negociacion y deliberacion. Un edificio cu hopi historia y cu unda mas cu 10 aña pasa Douane tabata ubica aden. Aworaki e ta un monumento cu lo wordo restaura y lo ubica Departamento di Naturalesa y Medio Ambiente (DNM) aden.
DNM su oficina ta situa na San Nicolas caba y considerando e tareanan amplio y responsabilidad di e departamento, e edificio cu e departamento ta aden actualmente a cuminsa bira chikito. Considerando e diferente desaroyonan aki (entre otro), a scoge pa pone DNM den e edificio monumental aki, Minister Oduber a splica. Monumentenfonds a adkeri/cumpra e edificio for di Gobierno pa cual e proceso di ‘aanbesteding’ lo tuma luga na final di november. Kier logra cu durante di e prome kwartaal di aña 2019, por incia cu e parti di reconstruccion y cu mas pronto cu ta posibel e edificio lo por bira disponibel pa DNM.
“E desaroyo aki ta forma parti di un proceso di inversion continuo den un area cu ta considera y ta sigui kere aden, cual ta San Nicolas como e ciudad di cultura y herencia. Manera treci dilanti na diferente ocasion tambe pa colega Minister Xiomara Ruiz – Maduro. E proceso ta sigui pa desaroya e economia cu ta premira pa San Nicolas, poniendo un departamento mas di Gobierno den e area aki. Asina poco poco cada stenchi necesario ta wordo poni pa por logra accentua e aspecto di herencia y cultura si San Nicolas. Diferente esfuerso ta wordo haci tambe conhuntamente cu colega di Turismo Minister Dangui Oduber y Aruba Tourism Authority (ATA), cu anuncio di diferente proyecto pa atrae turista parti pariba di nos isla.”
Minister Oduber a sigui splica: ‘espues cu comunidad a mira e edificio aki termina den un ruina, ta mira cu a base di e determinacion cu tin pa San Nicolas ta pone cu ta yega na e acuerdo aki cu Monumentenfonds. Ta gradici cada un di e miembronan di directiva y di maneho pa haci esaki posibel. Ta felicita DNM cu proximamente ta bay haya un edificio monumental pa funciona for di dje y tambe gradecimento na e arkitecto y henter e team cu lo ta encarga cu ehecusion di e proyecto.
Finalmente Pabien na San Nicolas cu ta mira movecion y desaroyo tumando luga un bes mas cu ta refleha e compromiso di e Gobierno pa cumpli cu San Nicolas como e centro di herencia y cultura y desaroyo economico nobo pa Aruba.