Den vision di Gabinete Wever-Croes pa Departamentonan di Gobierno ta pa pone integridad un prioridad. Siendo integridad un tema delicado, pa goberna un pais na e miho manera, e departamentonan di Gobierno mester tambe ta riba e mesun linea di integridad.
Ta e intencion pa trece integridad cerca di cada empleado publico den tur departamento di Gobierno. Lo conscientisa tur empleado publico kico ta integridad y bon gobernacion y kico ta e consecuencianan ora cu reglanan di integridad wordo kibra durante oranan di trabou.
Pa e motibo aki, Departamento di Recurso Humano ta organisa un conferencia tocante liderasgo y integridad pa tur hefenan di Departamento di Gobierno y nan HR. Hefenan di e departamentonan lo tin e encargo di presenta e puntonan di importancia di e conferencia na nan empleadonan.
Prome Minister Evelyn Wever-Croes ta enfatisa cu integridad tawata un punto di campaña hopi importante pa e partido cu e ta lidera, esta Partido MEP, como tambe ta keda un punto hopi importante programa di gobernacion di Gabinete Wever-Croes. Bon Gobernacion ta depende riba tur departamento di Gobierno como tambe di cada gobernante di nos pais pa brinda e pueblo di Aruba e miho maneho.
E Conferencia Liderasgo y Integridad ta tuma luga diaranson 17 di october 2018.