Mas lihe Bo busca ayudo, mas lihe Bo por cura di bo enfermedad
Comunidad mester realisa cu un pashent cu bay un psikiatra no ta loco. Esey ta algo cu Psikiatra dr. Nathalie Kingsale ta tende hopi. “E persona tin’e dificil caba cu su enfermedad. Awor bo ta bay dun’e mas dificultad door di yam’e loco. E persona ta malo, e tin mester pa Bo ta eynan p’e. E mester di sosten, e mester pa bo por yud’e, no pa bo kibr’e”, asina e specialista a duna di conoce.
Ta importante pa comunidad realisa cu problemanan psikiatrico ta un enfermedad y ta importante pa ta eynan pa e persona, pa e famia, pa e mama, pa e tata, pa e ruman, pa e tanchi cu ta malo y no pa bo caba di kibr’e mas. Pa e pashent ta importante pa nan trata di ta consciente di nan enfermedad y analisa kico nan mes kier cu nan bida. “No pasobra bo tin un enfermedad ta nifica cu bo bida a caba. Bo por sigui bo bida”, di acuerdo cu e specialista.
Aceptacion
E prome cos ta pa acepta cu bo tin un enfermedad, cu bo lo mester adapta cierto cosnan, pero esey nos tur tin cu haci. Ora bo ta bira grandi, bo tambe tin cu adapta, pasobra no por tur cos mas. Un hende cu ta diabetico tambe tin cu adapta. Asina tambe un pashent psikiatrico tin cu adapta, pero trata ainda wak kico bo por. “No mester keda concentra riba e enfermedad, pasobra esey ta parti di bida, pero concentra riba loke si por y percura con pa logr’e”, dr. Kingsale a conseha.
Drempel emocional
Ora pashentnan yega clinica Respaldo, ta nifica cu probablemente nan a pasa e drempel emocional caba. Desde 1 di Januari 2018, clinica cu antes tabata yama PAAZ, a bira Clinica Respaldo. E policlinica di Psikiatria, te na e momentonan aki, ta den e edificio di ex-PAAZ. Hopi hende tin dificultad pa bay sinta eynan. Nan ta sinti nan fastioso. Ta purba splica pashentnan cu Psikiatria no ta pasobra un hende ta loco. Ningun di e pashentnan ta loco, sino nan ta malo. Nan tin un enfermedad. “E loco nan mes ta cana p’afo”, asina e specialista a bisa cu un sonrisa riba su cara. “Esunnan cu ta bin clinica Respaldo ta malo. Ta trata di tene nan trankil y splica nan esey”.
Aumento den pashentnan na Clinica Respaldo
Dr. Nathalie Kingsale a confirma cu tin un aumento. Te cu 7 pa 8 aña pasa, pa 20 aña largo, tabatin solamente 2 Psikiatra na Aruba. Awor aki nan ta 4 Psikiatra. Y tur Psikiatra ta yen. Bo tin un lista grandi di hende cu ta drentando, cu tin cu warda 2 pa 3 luna prome cu nan por haya un cita. No por bisa exactamente cu tin mas enfermedad Psikiatrico of ta e hecho cu e drempel ta bahando of cu pashentnan ta mas dispuesto pa busca ayudo pa nan mes.
Hecho ta cu comunidad ta cambiando; antes tabatin hopi famia cu un mayor tabata na cas. Awendia mayoria mayornan ta traha of tin hopi famia cu tin un mayor so bibando den cas. Esey ta haci cu e stress den famia ta subi, cu tin menos tempo pa e mucha pa corigi’e, pa wak p’e y cu tin biaha e mucha ta desvia mas lihe cu mester busca ayudo p’e. Esey tambe ta subiendo, segun dr. Kingsale.
Ainda tin hopi taboo, aunke menos, pasobra ta nota cu pashentnan ta busca ayudo mas lihe. Bo ta haya famia of hendenan cu ta tarda masha largo mes, pa ora cu nan yega, por ta nan tin un pa dos aña depresivo of hasta psicotico. Un pa dos aña di nan bida cu nan a perde. Bo ta lucha, mientras cu si bo a bay na tempo, por ta Bo lo a haya ayudo y un ayudo mas cortico. Door cu ta tarda asina hopi, ta haci e pashent mas malo, e ora ta tarda mas hopi pa bira bon bek. Dr. Nathalie Kingsale ta spera pa hendenan realisa cu busca ayudo cerca un Psikiatra of Psicologo no ta nada straño.
Tocante Fundacion Respaldo
Desde aña 2017 e prome trabounan a inicia pa funda Fundacion Salud Mental Aruba, RESPALDO, den cual a uni servicionan y organisacionnan bou e mesun fundacion. Den cuadro di e Crisis Plan Social, Respaldo a wordo pidi pa trece e cuido pa mucha y hoben pa cu salud mental extra lihe na e nivel necesario. For di 55 trahado cu a inicia cune na un principio, ta spera di alcansa alrededor di 100 trahado na fin di e aña aki of comienso di otro aña. Tin dos policlinica un pa adulto y un specialisa pa mucha y hobennan. Como tambe tin un clinica cu 40 cama. Desde 1 di augustus 2017 e fundacion ta conta cu un Raad van Bestuur, cu ta inclui Dr. Hendrikus van Gaalen como Director Medico y Presidente, hunto cu Drs. Lex de Jong como Director di Operacion.