ORANJESTAD, Aruba – Siman pasa CAFT a entrega Gobierno di Aruba nan conseho. Gobierno ta contestando CAFT pa e ley por sali pa Raad van Advies y asina inicia e proceso legislativo. Lo saca afo dentro di algun dia e conseho di CAFT y Fraccion di AVP ta sperando ansiosamente riba dje. Parlamentario di Fraccion di AVP, mr. drs. Richard Arends a expresa di ta lamenta cu Parlamento ta ricibi informacion di e presupuesto for di otro organo y no for di Gobierno.
Algun siman atras Gobierno a reuni cu Parlamento pa duna splicacion riba presupuesto 2018, e ehecucion di esaki y e cuadro di financiero nobo. Pero nan no a contesta e preguntanan haci riba e cuadro financiero nobo, normanan nobo y esey ta pone cu Parlamento no sa kico ta e base legal di e conseho aki ni tampoco e cuadro financiero riba termino largo. Por a tuma nota cu publicacionan riba website di Gobierno riba consehonan of contestanan na e organo di supervision aki ta masha limita.
No a ricibi un cambio di ley pa loke ta trata supervision financiero. Parlamento no ta na altura cu tin un acuerdo cu Hulanda pa loke ta e cuadro financiero y normanan nobo pa futuro. Tampoco no ta hustifica kico ta e diferencia di 130 miyon menos si compara presupuesto 2018 y 2019, con esaki ta substancia. E gastonan di Gobierno ta sigui aumenta y Fraccion di AVP ta mira esaki a base di e patronchi di consumo di Gobierno.
Loke ta importante ta cu aunke Gobierno a uza un pronostico economico conservativo pa entradanan, Fraccion di AVP ta na altura cu falta di confiansa den economia lo resulta den un contraccion den e economia y cu lo no alcansa e entradanan cu Gobierno a presupuesta. Cifranan di Banco Central y e encuesta teni bou di comercio ta confirma e percepcion ey caba. Manera cu a bisa anteriormente, un falta di maneho economico coherente tin repercusion serio no solametne pa finansas publico, pero tambe pa otro terenonan manera educacion, infrastructura, labor y social.
Fraccion di AVP Lo sigui monitoria e proceso di cerca y recorda cu mester bin ley pa cambia e normanan di supervision financiero como un presupuesto supletorio 2018. No ta desconoci cu CAFT a aproba e presupuesto 2018 bou condicion di cu lo bin un reduccion di gasto di 12 miyon bou presupuesto di gastonan di personal. Segun declaracionan di Gobierno, a reparti esaki den dos aña.
Mest bisa cu te ainda no a tende nada mas di esaki, ni tampoco con Gobierno tin pensa di spaar e suma menciona den e ultimo tres lunanan di e aña aki. CFT a duna Gobierno beneficio di duda na inicio di aña ora a priminti cu lo cumpli cu algun peticion di e organo di supervision, pero no a cumpli cu esaki. Pues, ta interesante pa mira awor, den e luna aki di oktober ainda, unda Gobierno lo ta para y unda CFT lo ta para den e asunto aki.