Un estudio di Instituto Nacional Di Estudio Ambiental na Tsukuba, Japon a revela cu piscanan manera sardin, hering y anchovy, ta un alternativa preferibel ariba consumo di carni cora. Esaki pasobra e por a evita entre 500 mil y 750 mil morto na 2050 rond mundo.
E analisis di data a splica cu un consumo mas halto di e tipo di pisca aki ta ofrese benefisionan pa salud publico cu tambe por reduci e tasa di desabilidad di malesanan cu tin un relacion cu cuminda.
Segun e estudio, e idea ta pa por aumenta e consumo mundial diario di pisca per capita cerca di e nivel recomenda, y pa reduci cu 2% morto di malesa coronario di curason, accidente cerebrovascular(stroke), diabetes y cancer di tripa na 2050.
RESULTADO DI ESTUDIO
E estudio, publica den e revista Bmh GIobal Health, tabata basa ariba informacion di banco di data tocante e pronosticonan di carni cora pa 2050 den 137 pais, y tambe datonan historico tocante e captura di e piscanan aki den e habitad marino.
Nan a compara e estudionan cu ta relaciona cu consumo di carni cora y procesa cu un riesgo mas halto di malesa no transmisibel, pa determina cu alrededor di 70% di tur morto na mundo na 2019 tabata provoca pa e tipo di inclinacion aki.
Den e estudio, malesa coronario di curason, atake cerebrovascular, diabetes y cancer di e intestino a representa casi mita (44 %) di e cantidad aki, y malesa di e arterianan coronario a bira e mayoria.
E malesa aki ta asocia cu un nivel halto di consumo di carni cora y un deficit den e dieta di proteina marino.