Director Medico di Fundacion Respaldo, dr. Hendrikus van Gaalen, ta un Psikiatra hopi conoci na Aruba. El a bin for di chikito Aruba y despues di su estudionan na Belgica y Hulanda, el a regresa Aruba pa sigui cu su carera profesional. Pa dr. van Gaalen, Psikiatria ta su curason, yuda hende den su profesion ta algo cu e gusta semper. Tambe e ta hopi feliz cu awo tin mas profesional cu ta eherce e profesion aki.
Aruba a keda hopi atras den psikiatria, si compara cu Corsou, Hulanda y otro paisnan. “Nos no tin hopi hende. No a inverti suficiente placa den psikiatria y e cuido tabata hopi dividi. Hopi hende tabata haci un pida psikiatria e tempo aya. Awendia tin Fundacion Respaldo, kende hunto cu SPD y verslavingszorg, ta ofrece cuido completo riba psikiatria, segun dr. van Gaalen.
Aruba tin un comunidad hopi complica
Na Aruba psikiatria a bira mas complica. Posiblemente esaki tin di haber cu nos poblacion a crece. Ta hopi mas druk cu antes. No lubida, Aruba ta e di 19 pais mas druk na mundo. Si mira e demas paisnan, manera Singapore, etc., Aruba ta riba posicion 19 di en total 195 paisnan.
Nos isla tin hopi hende, hopi problema social, hopi trauma y por ta hopi mas pobresa di locual nos ta kere. Unda tin mas hende, ta bira mas complica. Ta mira tambe cu enfermedadnan mental a bira mas complica y mas dificil cu antes, segun dr. Van Gaalen.
Ta nota mas caso di depresion. Mas efecto riba muchanan. Si un mayor ta malo, door di e drukte, e no tin placa, e tin cu haci dos trabao, tur e problemanan social cu por haya of por ta e ta uza droga tambe, muchanan tambe ta bay sufri di dje y por haya un enfermedad mental. Por mira cu compara cu 10 aña pasa, e tabata hopi mas simpel.
AZV ta duna mas acceso na cuido mental
Dr. Hendrikus van Gaalen ta masha contento cu e rol positivo di AZV den cuido di enfermedad mental. E ta corda con antes esaki tabata hopi mas complica pa haya tratamento. Pashentnan cu tabatin un PPK-Kaart, no por a bay un specialista facil. Awendia Dokter di cas ta verwijs e pashent na un specialista y ta cla. Y den esaki AZV ta cubri e tratamento, cu hopi biaha sa tuma hopi tempo.
Mas cuido na muchanan y hobennan
Dr. Hendrikus van Gaalen a splica cu antes, si analisa e policlinica di kinder en jeugd, tabatin 1 solo Psikiatra y 2 Psicologo pa henter Aruba. E wachtlijst cuminsamento di e aña aki tabata 9 luna pa un cita pa un mucha. E ta increiblemente hopi! Awor aki el a bira 3 luna prome cu tratamento, mirando cu a pone mas profesional traha den psikiatria y e ta bayendo den un bon direccion y ta mira hopi mas pashent door di esey. E Psikiatra ta contento cu dor di redobla e cantidad di profesionalnan den e ramo aki, nan por mira mas pashent, pero tambe por dedica mas tempo na cada pashent, locual tambe ta hopi importante.
Probablemente na Aruba tin mas autismo compara cu otro paisnan
Tin hopi mucha cu ta sufri di un enfermedad mental. Psikiatranan ta convenci cu comparando cu otro paisnan den Reino Hulandes, incluyendo Hulanda, cu Aruba tin mas caso di autismo por ehempel bou di nos muchanan.
Na tur tin 20 diferente grupo grandi di enfermedad mental, cu tin bou di nan atrobe un gran cantidad di otro enfermedadnan mas chikito. Por ehempel tin e grupo di neurobiologico di mucha, un grupo di depresion, un grupo di problema di enfermedad door di trauma, un grupo di enfermedad di miedo, un grupo di adiccion, un grupo di problema cu drumimento, un grupo cu problema di sexualidad, un grupo di Altzheimer etcetera.
Psikiatria
Psikiatria awendia ta conta cu cuido den forma di ekipo, cu ta inclui Dokternan di cas, Psikiatranan, Psicologonan, Terapistanan, nursenan, ortopedagogo y asina por sigui menciona. Pues no mester pensa cu e enfermedadnan aki ta solamente pa un Psikiatra, sino e forma con ta brinda cuido awendia ta haci cu por atende mas pashent pareu. E ekipo para tras di e tratamento ta hopi mas varia y profesional.
Tur aña Aruba ta conoce 3 mil pashent nobo?
Si compara cifranan di Hulanda como ehempel, cada aña 3% di e tur hende cu nunca a haya un enfermedad mental, lo cera conoci cu un of otro enfermedad mental. Si e cifra ey ta conta pa Aruba tambe, esey ta traduci su mes cu di 100 mil habitante di Aruba, cu cada aña 3000 hende ta haya un enfermedad mental cu nunca den nan bida nan a haya prome.
Casi mita di nos poblacion lo haya enfermedad mental den nan bida
Si analisa otro cifranan aplicabel pa henter mundo, ta pronostica cu 45% di tur hende lo haya un enfermedad mental den nan bida. Pues por bisa cu di cada 2 hende, 1 lo haya un enfermedad mental den su bida, cu ta nifica cu mita di e poblacion, locual ta hopi! Dr. Hendrikus van Gaalen mes ta pensa cu mas of menos 6% di tur hende ta “cana rond” cu un enfermedad mental, sea cu nan ta consciente di dje of kisas nan no conoce e sintomanan ainda.
Tocante Fundacion Respaldo
Desde aña 2017 e prome trabounan a inicia pa funda Fundacion Salud Mental Aruba, RESPALDO, den cual a uni servicionan y organisacionnan bou e mesun fundacion. Den cuadro di e Crisis Plan Social, Respaldo a wordo pidi pa trece e cuido pa mucha y hoben pa cu salud mental extra lihe na e nivel necesario. For di 55 trahado cu a inicia cune na un principio, ta spera di alcansa alrededor di 100 trahado na fin di e aña aki of comienso di otro aña. Tin dos policlinica un pa adulto y un specialisa pa mucha y hobennan. Como tambe tin un clinica cu 40 cama. Desde 1 di augustus 2017 e fundacion ta conta cu un Raad van Bestuur, cu ta inclui Dr. Hendrikus van Gaalen como Director Medico y Presidente, hunto cu Drs. Lex de Jong como Director di Operacion.