ORANJESTAD, Aruba – 08 oktober 2018: Departamento di Salud Publico a tuma nota di un acto cu ta tumando luga no solamente contra nos leynan, sino tambe ta trece salud di nos comunidad den peliger. Ta trata aki di personanan cu riba medionan social ta ofreciendo diferente remedi pa bende sin ningun forma di instruccion y prescripcion.
Na prome luga como Departamento encarga cu Salud di nos poblacion nos kier desconseha comunidad di cumpra cualkier remedi riba medionan social of cualkier caminda cu no ta un botica.
Departamento di Salud Publico su seccion di registro ta encarga cu registracion y control di tur remedi cu ta wordo importa, pa garantisa calidad y brinda proteccion na nos comunidad. Remedinan cu ta drenta Aruba den forma ilegal no ta conta cu e supervicion aki y por causa daño na salud di e persona cu ta uza esaki sin prescripcion y tambe daño na salud di nos comunidad completo.
Rond mundo ta raportando e problematica di “resistencia” unda bacterianan ta bira resistente contra antibiotica. E problematica aki ta existi pa motibo di mal uzo di antibiotica caminda no ta caba tratamento di antibiotica completo of ta bebe antibiotica sin cu tin mester.
No ta tur enfermedad ta rekeri uzo di antibiotica y ora ta rekeri antibiotica ta nesesario pa caba e tratamento completo. Na momento cu esaki no sosode ta unda cu e bacteria ta bira mas fuerte y resistente na e antibiotica y ta rekeri un antibiotica mas fuerte pa por combati e bacteria.
MRSA ta un ehempel di bacteria cu a bira resistente na antibiotica y cu por causa morto prematuro di un persona enfermo. Pa e motibo aki Departamento di Salud Publico ta haci un apelacion na comunidad pa no cumpra ningun forma di remedi online ni tampoco na ningun caminda cu no ta un botica. Esaki pa proteha nan salud y di nos tur.
Pa mas informacion por tuma contacto cu Departamento di Salud Publico na 5224200.