Como Minister di Enseñansa, señor Armando Lampe ta responsabel pa UNESCO na Aruba segun reglamentacion di UNESCO Internacional cu ta e Minister di educacion di e pais mester ta e presidente di e comision nacional di UNESCO.
Na e momento cu e titular di Enseñansa a asumi e responsabilidad aki, a cuminsa deliberacionnan riba un cambio importante den UNESCO. Esaki ta e aprobacion di UNESCO Paris pa Aruba pertenece na clusters di UNESCO cu ta cay bou di e oficina di Kingston Jamaica.
E mandatario a duna un splicacion amplio di loke e cambio aki ta significa pa Aruba. For di aña 2001 bou di e gobierno saliente, a haci peticion na UNESCO pa Aruba pertenece na e secretariado di La Havana Cuba. Esaki a nifica cu Aruba no por a coopera en conhunto mas cu e otro islanan di Caribe Hulandes y esnan Ingles cuanan tur ta cay bou di di e secretariado di Kingston Jamaica. Esaki kiermeen cu Aruba y e demas islanan di Caribe a bay apart di otro cu hopi proyectonan. Aruba tawata cay bou di e secretariado di Havana Cuba cu tawata tin nan mesun retonan cu ta completamente diferente cu e islanan chikito manera Corsou y Sint Maarten, Bes Eilanden y otro islanan di Caribe.
Evaluacionnan haci y consehonan duna, a pone cu Minister Lampe a dicici di haci peticion pa e cambio aki pa asina por coopera mas cu e islanan menciona. Awo Aruba tambe ta cay bou di e e secratariado di Kingston Jamaica desde 21 di september ultimo.
Esaki pa Aruba ta un bon noticia. Ya caba a cuminsa coopera cu e demas islanan cu ta pertence bou di e secretariado di Kingston Jamaica den varios proyectonan.