Savaneta – Diadomingo den careda di 4’or di atardi, presencia di Polis ta wordo pidi cu urgencia, na un adres na Savaneta, pa un pelea cu lo tabata bayendo for di man.
Na yegada polisnan ta topa cu ambos partido na dicho adres. E problema tawata entre dos ruman, un ruman muhe y un ruman homber.
Un discusion a start, cu ken tin of no tin parti di un herencia y esaki lo a bay for di man.
Agentenan policial a tuma nota cu enberdad, e rumannan lo a bringa mirando cu ambos lo tawata tin rasca na curpa.
Despues di basta papiamento e agentenan a splicanan, e caminda pa cana y si nan lo ta desea di haci un denuncia contra otro, cu nan lo mester bay recherche.
Sa pasa cu varios biaha problemanan grandi sa surgi den famia, momento cu un ser keri fayece y ta laga un herencia atras, cu lo mester bay wordo parti entre miembronan di famia. Pesey semper ta bon pa laga un testamento cla, pa asina un notario reparti e bienesnan.
Ban spera cu e famia aki lo por resolve nan problema pacificamente.