Home Sports Aruba ta cla pa saca cara den Copa ABC

Aruba ta cla pa saca cara den Copa ABC

AVB ta invita comunidad pa yega stadion diasabra anochi

 

ORANJESTAD, Aruba: E aña aki ta tuma luga Copa ABC, unda e teamnan campeon y sub campeon den futbol lo representa nan isla. E aña aki Dakota y Deportivo Nacional lo enfrenta e campeon y sub campeon di Boneiro y Corsou.

 

Arubaanse Voetbal Bond (AVB) a tuma e iniciativa pa bin bek cu Copa ABC, cual antes tabata Copa Antiano. Harvey Clement di AVB a expresa cu nan ta cla pa inicia e prome wega di Copa ABC. E teamnan campeon, esta Dakota di Aruba, Jong Holland di Corsou y Real Rincon di Boneiro, lo keda nan pais. E teamnan campeon lo ta e anfitrion na cas, unda cu Dakota lo enfrenta SV Vesta di Corsou. Deportivo Nacional lo ta biahando diasabra mainta pa Boneiro unda nan lo enfrenta Real Rincon.

 

Diasabra pa 8:15pm e wega lo cuminsa na stadion Guillermo Prospero Trinidad, pero porta ta habri desde 7’or. AVB ta invita tur hende pa yega stadion trempan pa presencia e acto protocolario y despues por disfruta di un tremendo wega di futbol. Muchanan te cu 12 aña lo paga 5 florin pa entrada y di 12 bay ariba lo paga 10 florin.

 

AVB ta invita tur amante di futbol pa yega stadion Guillermo Prospero Trinidad diasabra anochi desde 7’or pa apoya e team Dakota cu lo ta representando Aruba, mientras Deportivo Nacional lo ta representando Aruba na Boneiro.