Home Politics Prome Minister Evelyn Wever-Croes: BAN PONE NOS ENERGIANAN HUNTO PA NOS PROTEHE...

Prome Minister Evelyn Wever-Croes: BAN PONE NOS ENERGIANAN HUNTO PA NOS PROTEHE NOS PAIS DI ABUSO DI MUCHA

Gobierno di ta convivi cu comunidad di Aruba

 

E comunidad un biaha mas a wordo sacudi diabierna tempran cu e veredicto di e caso unda e dos angelitonan a perde nan bida. Esaki a causa hopi conmocion den comunidad cual Gobierno di Aruba a tuma nota di dje.

 

Prome Minister Everlyn Wever-Croes a bisa den su discurso: “E frustracion y rabia den comunidad, mi ta comparti’e. E indignacion cu tin den comunidad, mi ta comparti’e. N’e momentonan aki ora nos wak bek atras, talves cada un di nos ta reacciona na un diferente forma. Nos por culpa e veredicto cu ta mucho abou, nos por culpa e mama cu mester tawata sa miho, nos por culpa e padrastro y puntra ki tipo di hende e ta pa kita bida di e dos criaturanan aki, nos por culpa e instancianan cu mester a investiga y raporta na tempo, por culpa famianan cu no por a haci nada pa salba e dos bidanan aki. Esakinan ta motibonan di frustracion y rabia den comunidad.

 

Na momento cu Gobierno a haya sa di e crimen aki, mesora a tuma accion. Nos a bin cu un Crisis Plan Social cu nos ta ehecutando y ya       poco poco resultadonan positivo di e plan aki ta birando visibel.

 

Na mes momento, Gobierno ta poniendo atencion riba e castigonan cu ta wordo duna pa corte pa bin cu solucionnan pa e castigonan aki bira mas halto cu ta cumpli cu e grado di seriedad cu e crimennan cu ta wordo cometi.

 

Un dia manera awe, ta pone nos para keto y sentimentonan di rabia ta drenta nos. Mi ta pidi nos comunidad, pa nos haci uzo di e oportunidad aki y conberti e rabia y frustracion den energia pa percura pa un cos asina nunca mas wordo ripiti. Nos tur ta responsabel di loke ta pasa den nos comunidad. Nos sa kico ta pasa rond di nos. Awo un acto cruel a pasa cu dos angelito. Y nos no ta desea di un dia habri corant y wak un ser keri sea ta famia of amistad a wordo maltrata te na su morto.

 

Na momento cu un ciudadano carga conocemento di actonan di abuso, e tin e deber moral pa raporta esaki na autoridadnan. Asina nos ta cuminsa percura cu algo asina nunca mas socode. Ora cu ciudadanonan raporta y instancianan haci nan trabou, nos lo no ta pasando den tanto rabia y frustracion awe.

 

Gobierno di Aruba ta haciendo di su parti. Nos compromiso ta pa percura cu cosnan asina no pasa nunca mas. Mi ta extende un invitacion na nos comunidad pone nos energianan hunto y pa nos tur bisa no mas na abuso domestico. Hunto y cu determinacion nos ta logra.

 

Recien Minister Croes y Minister Romero hunto a firma un areglo pa haci tur yamada gratis na Departamentonan di Asunto Social y di Bureau Sostene Mi, cu ta e punto central pa raporta abuso. Sea bo ta yama for di prepaid, postpaid, hybrid y telefon di cas, e yamada aki cu por salba un bida lo no costa abo nada. Cu esaki Gobierno kier elimina e barera y kibra e silencio di tur cu ta na peliger y cu mester di ayudo urgente.

 

Cu Dios bendiciona nos pais y duna nos forsa, sabiduria y determinacion pa hunto nos proteha nos pais”.