ORANJESTAD, Aruba – Diasabra mainta a tuma luga un brunch den Rimini Restaurant na Riu Palace Antillas. E evento tabata na honor di miembronan di prensa local, celebrando Dia di Prensa. Gerente General di Riu Palace Aruba, Juan Blanco, a saluda periodistanan na nan yegada y a desea tur un feliz Dia di Prensa.
Na final di e evento, cu a bay compaña cu un tremendo brunch hunto cu Mimosa, bou musica di piano, a rifa algun premio entre otro cena romantico pa dos persona y estadia pa un fin di siman, cu a bay pa Hilario Doncker di Hits 100.9FM.
Tur presente a ricibi un bunita “mug” di Dia di Prensa, den forma di un lens di camara, un aprecio masha special pa tur cu ta eherce e profesion special aki den nos comunidad. Un mug asina sin duda lo tin bon uzo den e trabou di prensa, cu hopi biaha ta bay pa oranan largo y iregular.
RIU Hotels & Resorts a habri Riu Palace Aruba na aña 2007. Debi na e gran exito di su prome hotel na Aruba, e compania a dicidi di adkiri un di dos hotel, habriendo Riu Palace Antillas na aña 2014. Hunto e dos hotelnan aki ta maneha mas o menos 50 mil huesped pa luna, cu un nivel di grado di ocupacion mas halto riba nos isla. Entre e dos hotelnan RIU na Aruba, nan ta emplea riba 800 trahado, brindando huespednan e miho nivel di servicio.