106
Paradera – Marawiel: Diadomingo atardi 4:15, un caso mas di hit & run ta tuma lugar. Polis ta wordo manda na Great Rich y na Marawiel pa un auto cu a hit and run dos biaha.
E biaha aki tawata na altura di Great Rich bar restaurant na Paradera.
Ariba e crusada pariba di Great Rich, un Volkswagen Crossfox ta dal cu velocidad halto patras di un Hyundai Accent.
Despues mes ora ta move cu velocidad halto direccion Babijn pa Marawiel.
Den e bocht yegando Sero di Cristal pa Marawiel e ta perde control, bayendo na su man robes dal contra algun baranca.
Debi na e velocidad halto, e auto a sigui y bay dal contra un auto staciona na e cas.
Mesora e chauffeur kende tabata bisti cu un t-shirt blanco y un short color cora a baha for di e auto y a core bay direccion pabou.
Di biaha un persona a sali bay su tras, pero lamentablemente den e mondi grandi eybanda ela perde.
Un rato despues nan a bolbe spot e chauffeur den e mondi, dos unidad di polis a busca entre e barancanan grandi pero sin resultado.
Segun un habitante cu a mire, e ta sin sapato den e mondi ta core rond. Pero por medio di e plaachi number nan tabata sa na ken e auto ta pertenece y ken tabata e chauffeur.
E volkswagen Crossfox shinishi di e persona a keda confisca y cu takelwagen ela wordo hiba na warda di polis.
Mas o menos un mey ora despues cu polis a termina na e sitio, ta drenta un informacion cu e chauffeur Hulandes cu a hit and run ta canando dilanti Bamboo bar na Babijn bayendo direccion pabou, despues di un rato ela para na un cas na Bloemond papia cu un persona y na e cas aki polis a tope, ela keda deteni y transporta pa warda di polis na Santa Cruz.