Home Police P.A.A.Z. Pashent benta canto di caminda dilanti su porta di cas

P.A.A.Z. Pashent benta canto di caminda dilanti su porta di cas

Hooiberg – Diasabra pa mas o menos 7’or di anochi, polis a bay un adres na Hooiberg caminda tawata tin un homber benta dilanti su cas.

Na yegada polis enberdad ta topa cu e homber benta canto di caminda, dilanti di e porta di cura di su cas.
Segun un testigo e persona tabata tin mas cu 2 ora benta eybou den e mesun posicion.
E homber a keda benta den un posicion, cual tabata ariba su lomba y e no tawata move.
Siendo paden e cas tabata tin hende, pero aparentemente niun no lo tabata sa cu e ta benta eybou, paso niun persona a sali, ni pa topa cu polis.
Diasabra merdia
Diasabra pa mas o menos 2’or di merdia, polis a wordo notifica, cu tin un persona benta na altura di e bushalte na Hospital.
Informacion haya e momento ey, tawata bisa cu, e persona a wordo hiba door di personal di Hospitaal den rolstoel te na e bushalte y eynan nan a lague, kizas pensando cu famia lo bin buske ?
E momento cu polis a yega, berdad nan ta topa cu un homber for di tino, cu segun testigonan lo tawata tin basta rato benta na e bushalte.
Agentenan a nota tambe cu e homber tawata tin un sticker (Dagpas di e dia anterior) di Hospital pega na su paña ainda. Mesora e polisnan a pidi pa un ambulance, cu a presenta den algun minuut na e sitio.
Paaz pashent
Personal di ambulance cu a yega na e sitio, mesora a reconoce e homber aki, kende ta un pashent di Paaz y cu elo a wordo treci diabierna anochi hospital y cu lo a keda interna.
E personal di ambulance na e sitio a opta pa un biaha mas hibe Eerste Hulp y despues supuestamente e lo mester a bay Paaz.
Diasabra anochi 7:00
Diasabra anochi den careda di 7’or, patruya di Santa Cruz ta bay na un adres na Hooiberg pa un homber benta dilanti un cas.
Dilanti di porta di cura di e cas cu ta cerca di caminda nan ta haya e mesun Paaz pashent benta, cu supuestamente lo a mester a wordo interna merdia den Paaz.
Na su paña ainda tabata tin e dagpas di Hospital, di e dia anterior o sea diabierna. Por a mira na su brasa robes un pleister, unda nan ta prik sanger.
Segun testigo, e homber lo tawata tin basta rato benta dilanti di e porta di cura, den e mesun posicion.
Polis na e sitio a pidi pa presencia di un ambulance. Mientras polis tabata wardando riba ambulance un ruman homber di e pashent ta presenta na e sitio. Segun su version, e ruman aki ta gusta haci “mala mucha”, y ta haci su curpa stijf ora e cay abou.
Parse cu e tata kende ta un persona di edad lo no por wak bon mas pe.
E ruman hunto cu e agentenan policial a carg’e hibe paden.
Pa cuanto dia e lo keda paden no ta duidelijk, paso segun nos a compronde e ta huy di cas.
Dicon ela wordo opgenomen diabierna na Hospital no ta conoci. Pakiko ela wordo hiba door di personal di Hospitaal den rolstoel y laga pa su cuenta na e bushalte ta keda e pregunta.
A avisa famia cu nan pone na e bushalte pa nan bin buske ? Si ta asina, no ta manera pa trata un ser humano cu tin problema mental y no por yuda su mes.