Ademas 9 persona a wordo instala como miembro nobo di e club
ORANJESTAD – Diasabra ultimo Aruba One Happy Island Lions Club a instala su directiva pa e aña Leonistico 2018-2019, alavez e club a celebra su promer aniversario. Tabata un anochi hopi ameno y bunita na Don Bosco Club cu a wordo prepara pa e ocasion special aki pa e miembro Leonnnan di e club nobo. E anochi aki a duna e relato di aña caminda a wordo presenta un total di 34 proyectonan di servicio cu a wordo realisa den transcurso di e aña Leonistico cu a culmina na fin di e luna di juni ultimo. Apesar di ta un club nobo, e club a resalta cu su proyectonan manera e “Beach clean-up” na Plastic beach; na entrada di Colony, cual beach a wordo adopta pa Aruba OHIL Club, E “Paranda pa nos Clasiconan” na cas di nos grandinan, “Campaña di Concientisacion pa Un Trafico Sigur”, e famoso “Sinterklaas Funwalk”, “Sinterklaas pa nos personanan special” durante Paranda di Bochincha, “Proyecto conhunto cu Aruba Doet”, Blood Donor Drive y CPR Course pa miembronan. Ademas mester menciona cu Aruba OHIL Club a sali den e top 10 di e mihor clubnan pa 2017-2018 pa distrito Multiple E, Venezuela, Corsou, Bonaire y Aruba.
Reconocimento Miembronan Leon di Aña 2017-2018:
Pa e aña Leonistico cu a transcuri e presidente saliente Compañero Leon Ferdinand Curiël a reconoce dos miembro Leon cu a resalta grandemente durante e aña menciona, cual ta e Miembronan di directiva Sra. Carla Martinus, Secretaria y Sra. Geraldine Frank, Tesorera. Ambos a wordo sorprendi cu un bunita plakaat di reconocimento, dos hende muher cu a demostra liderazgo y pasion y asina a wordo reconoci como Miembronan Leon di aña. E directiva diario den nomber di miembronan di club a duna un reconocimento special na e presidente Sr. Ferdinand Curiël pa su liderazgo sobresaliente demostra como presidente di e club. Mas aun e miembrecia a re-eligi Sr. Ferdinad Curiël pa ta presidente di e club un aña mas. E presidente a gradici tur demas miembronan pa nan contribucion y trabaonan realisa na beneficio di nos comunidad.
Reafirmacion Miembronan Fundador:
Como invitado special tabata presente Sra. Leon Doris Eugenio de Lacle, Pasado Gobernador di e Distrito Multiple E di Clubnan di Leonnan. Sra. Eugenio -Lacle asisti pa Compañero Leon Haime Lacle y Compañera Leon Aliyuri Grandi Navarro, a efectua un acto special caminda e miembronan fundador a renoba nan huramentacion como miembronan di e club di servicio mas grandi na mundo. Tabata hopi emocionante y impactante e ceremonia aki, mas aun cu Aruba One Happy Island Lions Club ta un club centenial conmemorando 100 aniversario di e organisacion di Clubnan di Servicio mas grandi na mundo, Lions Club Internacional.
Directiva 2018 – 2019:
Pasado Gobernador di Distrito E, Compañera Leon Doris Eugenio de Lacle a huramenta e siguiente Compañero Leonnan como Directiva 2018-2019: Presidente entrante Ferdinand Curiël, Vice-Presidente Armando Boekhoudt, Secretario Carla Martinus, Tesorero Geraldine Frank, Comisario encarga cu Afiliacion di Miembrecia Junior Arends, Comisarionan pa 2 aña Indra Hassell-Duarte y Sergio Duarte, Comisarionan pa 1 aña Eugene Dubero, Leonard Pengel, Richard Tromp y Leon Raymond Wever.
Instalacion Miembronan Nobo:
Durante e evento aki tambe un grupo di 9 personanan motiva y dinamico a wordo instala como miembro nobo pa e Presidente Compañero Leon Ferdinand Curiël. E miembronan nobo cu orguyosamente awor tambe ta forma parti tambe di Aruba OHIL Club ta compañero Leonnan: Sandro Boekhoudt, Claudia Boekhoudt-Abath, Kenia Brito, Carolina Croes, Elly Croes, Angelo Koolman, Vanessa Olive, Rumaika Rafael y Sergio Winterdal. Despues cu e miembronan a huramenta, nan a ricibi nan certificado y pin y asina nan a bira miembro oficial di Aruba OHIL Club. Ser un miembro di un Club di Leon, ta mas bien un forma di biba, caminda cu e miembro Leon ta semper atento den e desaroyo den nos comunidad y ta cla pa yuda pa un mihor mayan, manera e dicho “Where there’s a need, there’s a Lion”, unda cu tin un necesidad, tin un miembro Leon.
Reconocimento Ciudadano Ehemplaar:
Relaciona cu su promer aniversario e club hoben di Leonnan na Aruba a introduci un reconocimento anual di e club cu titulo “Ciudadano Ehemplaar”, cual ta un reconocemento cu Aruba OHIL Club ta duna na un ciudadano local cu a sobresali pa su trabao y servicionan boluntario na mehoramento di nos comunidad. Pa 2018 Sr. Castro Perez fundador y organisador di Aruba Reef Care Project pa mas di 23 aña, y mirando cu esaki ta cuadra den e programa di medio ambiente di Lions Club Internacional, a nomina Sr. Castro Perez pa e ricibi e reconocemento “Ciudadano Ehemplaar”. Pa motibo cu Sr. Castro Perez tabata den exterior, su esposa Sra. Nancy Perez a ricibi e reconocemento den su nomber y a gradici pa e bunita reconocimento.
Aña Leonistico 2018 – 2019:
| E aña nobo sigur lo bay tin su retonan y mirando e motivacion y entousiasmo di e miembronan sigur Aruba OHIL Club lo cumpli cu su meta di sigui sirbi comunidad y esnan den mas necesidad. Como club nos por alcansa horizontenan nobo den servicio ora cu nos tin compromiso hunto y desaroya strategianan nobo y surpasa nos limitenan. Cu vision y perseverancia tur cos ta posibel. Nos mester alcansa nivelnan nobo di servicio humanitario cu nos bunita pais no a conoce ainda. Nos hoben- y grandinan lo ta central den nos programa di servicio. Ademas lo continua organisa diferente campaña di concientisacion y lo bay intensiva e campaña di concientizacion pa un Trafico Sigur. |
| Gratitud general:
Relaciona cu su promer aniversario, Aruba One Happy Island Lions Club ta gradici tur su miembronan y nan famia, oficina di Lions Club Internacional, su club patronisador Club de Leones Cabimas Costa Oriental Venezuela, e comunidad local, comerciante- local, prensa en general y demas persona-, instancia- y organisacionnan manera e.o. Rode Kruis, Aruba Doet, IBISA, Dj. Alvin, Don Bosco Club cu a coopera cu e club pa asina por tabata tin un aña exitoso. Aruba OHIL Club ta conta cu mesun cooperacion y sosten di un y tur durante e aña Lionistico nobo. |