Ta pa un tempo caba na un manera sporadico, pero continuo y camufla, e directora di Instituto Policial E.J. “Watty” Vos ta bin ta anunciando cu lo hasi cambio di nomber na e instituto di formacion policial aki. Cada bes ta anuncia un nomber diferente, pero semper lagando Watty Vos su nomber afor. Pa cual motibo mester asumi cu e meta real ta pa saca, na un manera camufla, e nomber di Watty Vos for di e Scol di Polis.
Recientemente a duna e motibonan pakico e cambio di nomber mester tuma lugar, poco motibo cu no tin pia pa para ariba corda pa tin base pa laga nomber di e fundador di e scol di polis afor. E la menciona cu pa motibo cu e scol no ta dunando of lo no duna les exlusivamente na polis so mas, pero cu otro instancianan di e cadena hudicial tambe lo haya nan formacion na e scol aki, pa cual motibo e nomber lo bai cambia pa Academia di Husticia y Seguridad di Aruba.
A wordo menciona cu banda di Cuerpo Policial Arubano, cu KIA, Kustwacht, CEA, Migracion y Cuerpo di Aduana tambe lo haya nan formacion akinan. Como sifuera cu awor numa e wiel a wordo descubri. Desde su inicio na Isaac Wagemakerstraat Scol di Polis a bin ta duna curso y formacion no solamente na polisnan, pero tambe na e bewakernan di Huis van Bewaring Dakota, despues KIA, como tambe na e oficialnan di immigracion. Cu otro palabra esaki no ta algo nobo pa cual mester bay inventa e wiel di nobo.
Tambe a menciona cu ta dunando of ta bay duna curso na e oficialnan tanto di Kustwacht como di CEA. Ora bo ta papia di Kustwacht ta e nomber di Watty Vos ta bin den mente, pa motibo cu ta su persona ta esun cu a tuma iniciativa pa awe awanan teritorial di Caribe Hulandes tin proteccion di Kustwacht di Reino. Mesun cos ta conta pa CEA, cual departamento ta Watty Vos a funda bou di e nomber di Dienst Beveiliging Aruba, conoci den boca di pueblo como “Blue Team”.
Mester ta hopi ingenuo of di mala fe pa expresa cu e vision planta den suelo di e pueblo di San Nicolaas 43 aña pasa a keda chikito pero awor (numa) ta (bai) crece. Un vision cu a crece, adapta y bai cu tempo durante 43 aña y cu a laga tur esnan cu a bringa Watty Vos cu alma y cuerpo cu hopi gana di wak e Scol di Polis fracasa. Cu e edificio actual na Fort Heuvelstraat a bira chikito pa e cantidad di alumno y diferente cursonan cu ta wordo duna, ta prueba palpable cu e vision di Watty Vos tin derecho di existencia. Como tal su nomber mester keda den cual variante cu por pensa di pone na lugar di e scol mirando cu su base, su raiz ta esun traha, planta riba 16 di augustus 1975 den suelo di e pueblo di San Nicolaas.
Cu otro palabra nomber di Watty Vos hamas por wordo kita como tambe sali bai busca tereno den pueblo di San Nicolaas mes, mirando cu ta ey ta e cas di Scol di Polis. Nada di bai busca lugar otro parti di Aruba pa construi un edificio nobo pa Instituto Policial E.J. “Watty” Vos.
Si acaso ta sigui insisti pa laga elimina Watty Vos su nomber for di Scol di Polis, cu e (mal)hecho aki ta habriendo un porta pa den futuro cualkier gobierno, politico of ambtenaar por laga kita na su antoho nombernan di juinan di tera for di cayanan, edificionan, instancianan, scolnan, parquenan, plazanan of stadionan. Un tendencia hopi peligroso mes pa motibo cu bo ta secuestrando e reconocimento na e logronan di e juinan di tera aki. Un porta cu dificilmente lo por wordo cera pa motibo cu e eliminasion di e nomber Watty Vos for di e Scol di Polis lo marca e precedente di esaki.
Mare mi por ta robes den esaki, pero analisando e motibonan fofo duna pa cambia nomber di Instituto Policial E.J. “Watty” Vos pa Academia di Husticia y Seguridad di Aruba, lo mi no keda straña cu despues lo anuncia cu ta cambia e fecha 16 di augustus como dia di polis di Aruba mirando cu e fecha di e celebrasion aki ta danki cu riba e fecha aki 43 aña pasa Watty Vos a inaugura Scol di Polis contra biento y marea. Cual fecha di celebracion tabata un escogencia di Alto Mando Policial net despues di nos Status Aparte. Practicamente despues di nos himno y bandera e scol di polis ta un simbolo di nos autonomia, mirando cu e la wordo realisa casi 11 aña promer cu nos Status Aparte, pa motibo cu e ponencia di e tempo ey tabata cu e formacion policial mester keda central na Corsou. Un bes mas mare mi por ta robes den esaki.
Si e cambio di nomber sin e nomber di Watty Vos aden continua, e proximo gabinete di AVP Watty Vos su nomber lo wordo restaura na e instituto di formacion di husticia y siguridad aki.