ORANJESTAD, ARUBA: Recientemente a tuma lugar na Centro di Husticia na Macuarima celebracion di 40 aña di Hubileo. Famia, coleganan y amistadnan a bini hunto pa mira nan ser keri celebra nan 40aña den nos organisacion policial.
Sr.Dinzey y Sr. Chaco Cornelio ta e 2 colegenan cu ta celebra nan 40 aña den organisacion policial. Un trayectoria largo den e mundo policial. Nan ta un di e coleganan cu a bira polis prome cu Aruba a logra su Status Aparte. Nan tin amplio experencia for di unda nos cuerpo a cuminsa y unda e ta awe. “Alto comisario Hoo ta gradici nan pa nan tempo, sosten, sabiduria, integridad y profecionalidad den KPA. Nan a dedica hopi na KPA y ainda nan ta dedicando tempo pa educa y yuda e polisnan hoben cu ta drentando nos organisacion. Nan ta pasando nan conocimento policial pa e hoben polis por sigui guia nos pais pa mantene e orden y seguridad”.
Den cuadro di e celebracion aki Sra. Jones tambe a ricibi su landsbesluit. Alto comisario ta contento di wak Sra. Jones preserva y sigui crece den su trabou di cada dia.
Sra. Hoek-Maduro tambe a ricibi su Hoofd Agent. Maske cu tabata tin contratiempo pa su landsbesluit pero e semper a preservera y sigui dedica tempo y zjeito pa su trabou.
Alto comisario Sr. Hoo ta gradici e famianan di cada un colega sin nan sosten e no lo ta posibel. E trabou den Cuerpo Policial Aruba ta exigi hopi y ta danki na nan famia pa e amor y pasenshi hunto por logra esaki.