Home » Parlamentaria Marisol Lopez-Tromp Crisisheffing ta bin danki na e mal maneho di esun cu a bisa cu e ta orguyoso cu e debe tey pa nos tur pague pa futuro

Parlamentaria Marisol Lopez-Tromp Crisisheffing ta bin danki na e mal maneho di esun cu a bisa cu e ta orguyoso cu e debe tey pa nos tur pague pa futuro

by Admin
0 comment 93 views

Parlamentaria Marisol Lopez-Tromp durante su disertacion den reunion publico di Parlamento pa trata e ley di crisisheffing a bisa claramente cu Fraccion di POR lo sostene e ley aki pasobra ta necesario pa sanea e situacion financiero awo y no hala e problema pa futuro.

El a mustra cu durante e 8 aña di gobernacion di AVP a conoce 3 diferente minister di Finansas. Desde 30 di october 2009 te cu 31 di december 2013 tabatin minister Mike de Meza. E tempo ey caba tabata surpasa presupuesto y fin di aña tabata bin cu presupuesto supletorio. Ya caba e tempo ey tabatin preocupacionnan pa cu e situacion financiero na Aruba. Despues di eleccion a conoce Minister Juan David Yrausquin cu a ocupa e posicion di 1 di januari 2014 te cu 4 juli 2014. E ex minister aki tabata basta idealista y a pensa di bay corta den e presupuesto y a pidi cooperacion pa economisa. Loke por a ripara e tempo ey y cu a conduci na su retiro ta cu e no a haya sosten bou di su mesun coleganan minister. Si el a haya e sosten, kisas e debe lo tabata menos y no lo a conduci na un retiro hopi comenta. Despues a bin Minister Bermudez cu tabata for di 28 di juli 2014 te cu 17 di november 2017. Hopi a pensa cu e minister aki lo a hiba un maneho profesional pa loke ta finansas y cu lo a tuma e decisionnnan cu mester a tuma, pero no a dura mucho y den tempo corto el a haya un klem riba su boca for di e propio Prome Minister. E cambionan cu el a menciona den reunion publico den Parlamento cu el lo bay haci, no mucho tempo despues el a keda sin hacinan of no a haya e sosten di su coleganan pa hacinan.
Lopez-Tromp ta continua bisando cu ta tratando un ley di crisisheffing pa diferente motibo manera ta acumulacion di debe den transcurso di añanan, falta di disciplina, falta di transparencia, falta di documentacion pa cu Parlamento y e forma di traha di Gobierno anterior cu a goberna for di dos diferente forma. Uno for di Cocolishi cu nan hendenan sin cu departamentonan sa ki decisionnan ta wordo tuma y e otro ta door di pretende cu departamentonan ta duna consehonan y informacion, siendo cu nan no tabata envolvi. Consecuentemente a bin cu e situacion unda nos pais a conoce un KB y nos Prome Minister a bay den un welga di hamber cu a haya atencion hasta na nivelnan internacional y no na un manera positivo. En bes cu e tempo ey a bay over na tene discplina pa gobernacion y tin curashi pa tuma e decisionnan cu mester a tuma, a sigui malgasta placa cu no tabatin y a yega na e situacion unda a bin cu e ley di CAFT.

“Como un di e personanan cu e tempo ey a vota pa e ley aki den Parlamento, mi por bisa cu esaki tabata simplemente pa e motibo cu como miembro di Parlamento y e tempo ey como Presidente di Parlamento, a experiencia cu nos no tabata ricibi datonan, cifranan, raportnan for di gobierno, particularmente esunnan financiero. E tempo ey tabata keda na relatonan den prensa, pero e cifranan real no tabata wordo ricibi, consecuentemente bo trabou pa haci e control no por tabata full efectivo manera cu e lo mester ta. Tambe por a constata discrepancianan entre loke tabata wordo treci pa un minister y loke ta wordo treci pa un instituto of instancia financiero, inclusive diferente departamento:, Parlamentaria di POR a trece dilanti.
Continuando el a bisa cu awo cu e ex prome minister, esun responsabel pa e situacion actual, a bisa literalmente ora el a wordo reclama riba e deficit y e debenan grandi:‘Mi ta para cu orguyo pa bisa cu e debe tey pa nos tur pague pa futuro”.

“Awel shonnan e dia a yega pa paga y hopi mas lihe cu nos a pensa pasobra awo nos tin un gobierno responsabel, un gobierno cu sa cu no por laga nos yiunan wordo endeuda di e forma aki. No a tene nada secreto, desde un inicio diferente minister a bin Parlamento y splica kico a wordo encontra pa loke ta e situacion financiero, pero tambe kico no a wordo encontra pasobra no tabatin un traspaso debido di carteranan di diferente minister.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio