Home » Lider di Fraccion di POR, Marisol Lopez-Tromp Nos ta vota na fabor di e ley di crisishefing pa pueblo por tin espacio y alivio pa garantisa nos yiunan un bon futuro

Lider di Fraccion di POR, Marisol Lopez-Tromp Nos ta vota na fabor di e ley di crisishefing pa pueblo por tin espacio y alivio pa garantisa nos yiunan un bon futuro

by Admin
0 comment 101 views

Marisol Lopez-Tromp, lider di Fraccion di AVP den reunion publico di diamars pa trata e ley di crisisheffing a bisa cu nan ta den Parlamento pa sanea un situacion financiero unda a dicidi pa no prolonga e desaster hereda, sino ta tuma decisionnan pa coregi esakinan. Tambe pa pueblo haya claridad riba cada debchi di su placa como pagador di belasting.
Lopez-Tromp ta puntra dicon esnan cu awe ta papia di manifesta, di welga, etc, e tempo aya no a haci miles di pregunta, dicon no a exigi respuesta. Ta preguntanan cu si e tempo ey a pone pia abou pa nan kisas awe nos no tabata den e situacion cu nos ta.

Igualmente e mesun exponentenan aki ta papia di impacto social riba pensionadonan, riba areanan social, muchanan, etc. cu e ley aki lo trece cune. E hendenan aki ta lubida cu daño social ta loke a wordo sufri den ultimo añanan pa e negligencia pa cu e ser humano caminda cu placa a bay mas bien pa otro aspectonan cu no tabata directamente pa pueblo su bienestar general.
Hunto cu su colega Alan Howell, Fraccion di POR a presenta un iniciativa di ley pa bin cu castigo minimo pa entre otro atraco. Pero banda di e tipo di atraconan menciona den e iniciativa, tin otro atraconan, atraco contra e caha di pueblo; unda placa di pueblo ta wordo uza pa meta cu no ta aproba den Parlamento, un tipo di atraco unda despues ta bin trata na legalisa pa medio di un presupuesto supletorio loke a gasta y cu no tabatin permiso pa uza. E tipo di atraco aki tambe mester ta preocupa riba dje y actual gobierno y parlamentarionan den colacion a pone un fin na dje.

Seguidamente Marisol Lopez-Tromp a bisa cu awor Parlamento ta haya e informacion necesario, no solamente danki na e ley di CAFT, pero tambe door di e Ministernan cu ta informa parlamentarionan debidamente.

Riba e ley di crisisheffing el a indica cu Fraccion di POR ta sostene e ley aki pasobra ta necesario pa sanea e situacion financiero di nos pais awo, no ta hala problema pa futuro. “Nos tin curashi, nos no a wordo nombra como politico pa djis ta popular, nos no ta den concurso di reina ni di prins y pancho, nos tey pa tuma decisionnan responsabel pa nos pais y pa mañan nos pueblo por tin e espacio y alivio pa por garantisa nos yiunan un bon futuro. Pesey nos ta tuma e decision aki, ta pesey pueblo a vota pa nos”.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio