Home Police Den caya Captain Rodgers, un homber a wordo seriamente maltrata, cu slanan...

Den caya Captain Rodgers, un homber a wordo seriamente maltrata, cu slanan severo na cabes ela keda benta riba caminda

Caya Captain R. Rodger, San Nicolas: Diahuebs pa mas o menos 5’or y 15 di mainta, polis ta wordo manda cu urgencia na dilanti BSL Laundry den Caya Captain R. Rodger, caminda un persona tabata wordo severamente maltrata.

Na yegada enberdad e agentenan policial ta bin topa cu un homber tur na sanger benta riba caminda dilanti di e Laundry, e homber tabata sangra hopi na cabes y tabata saca sanger basta for di su boca. E agentenan na e sitio mesora a pidi pa presencia di ambulance cu hopi urgencia.

Aparentemente un rato prome e persona aki lo a haya problema den un bar, despues cu ela sali for di e bar y tabata canando bayendo direccion pabou den Caya Captain R. Rodger, su tras lo tabata biniendo un otro homber cu na dado momento a dal’e di trincion varios biaha na su cabes cu un palo of pida tubo cu consecuencia cu ela haya slanan basta severo na su cabes.

Despues cu personal di ambulance a trat’e na e sitio, cu urgencia e la wordo transporta pa hospital. E caso ta den man di autoridad pa mas investigacion.