Kamerlingh Onnesstraat, Oranjestad: Diahuebs algo pasa di 4’or di atardi, polis ta bay pa atende cu un auto cu a bolter pariba di Watergate den De La Sallestraat.
Na yegada e patruya ta bin topa na e crusada di Kamerlingh Onnesstraat cu De La Sallestraat cu Toyota Corolla A 21337, gekentel riba su banda drechi. Na e sitio nan a bin compronde cu e chauffeur tabata biniendo for di De La Sallestraat y na momento cu ela bira pa drenta Kamerlingh Onnesstraat, e chauffeur a tuma e bocht demasiado grandi y a hala full na su man robes y asina a subi e spandraad, cu e consecuencia cu e auto a bolter riba su banda drechi.
E chauffeur no tabata herida pero si e auto no tabata tin niun documento na ordo y ni seguro, aparentemente e chauffeur lo a caba di cumpra e auto. Takelwagen priva a presenta pa bay cu e auto y Elmar tambe a yega na e sitio pa drecha e palo di lus.