ORANJESTAD, Aruba:Recientemente Dr. Horacio E. Oduber Hospital orguyosamente a celebra apertura di e camber pa Interventie Cardiologie y Interventie Radiologie. Un compleho ultra moderno na unda ta introduci e servicio completamente nobo pa Aruba cu ta intervencion di cardiologia y servicionan adicional awo cu e aparatonan di e tecnologia mas moderno pa loke ta intervencion di radiologia.
Director di cuido di Hospital, sr. Ezzard Cilié a splica cu awor no mester manda pashentnan mas afo pa tratamento nan cardiovascular invasivo. Na aña 2012 ya caba a cuminsa papia di e posibilidad nan di intervencion cu diferente stakeholders. Na aña 2014 a traha hunto cu un instituto na Hulanda unda cu a haci diferente mision pa cu intervencion di cardiologia. Esaki no a duna e resultado desea y e camber na Hospital no tabata optimal pa sigui cu e proceduranan aki. Na 2015 a sigui investiga e posibilidad nan y a sinta hunto cu Academisch Medisch Centrum (AMC) y Onze Lieve Vrouwe Gasthuis pa establece un cuido nobo 24/7 pa loke ta intervencion di cardiologia. Hunto cu e institutonan Hulandes aki a sigui desaroya e plan y a cuminsa busca e aparatonan mas nobo y adecua pa e proyecto aki.
Despues di a sinta hunto cu AZV y a firma contract cu e compania Siemens pa cu e construccion di un compleho nobo cu e aparatonan mas sofistica pa intervencion por a start sali cu e proyecto. A cuminsa cu e construccion na augustus 2017 teniendo cuenta cu e compleho nobo mester cumpli cu e exigencia y normanan di Hulanda cu ta mescos cu un camber di operacion.
Na september 2017 a firma contract cu e institutonan AMC y OLVG pa educa y guia dos cardiologonan local pa asina caba nan specialisacion di intervencion. Tambe tin enfermeronan local cu ta wordo specialisa actualmente pa asisti e intervencionnan cardiologico.
Sr. Cilié tabata contento cu tur cos a cana bon y awo por haci uzo di e compleho nobo regularmente. Mientrastanto lo sigui conta riba e sosten di AMC y OLVG pa despues Hospital lo por haci tur intervencion di cardiologia independiente cu e cardiologonan local.
No ta un secreto cu aki na Aruba tin un problema grandi di sobrepeso cu hopi biaha ta resulta den problema di curason tambe. Sr. Cilié a duna di conoce cu awor tin hopi pashent cu no mester bay afo mas y por keda trankil na Aruba hunto cu nan famia. Esaki na final tambe ta aporta na menos gasto di salud. Dia 9 di april a haci e prome operacion den e camber di intervencion di cardiologia y p’e prome aña hospital ta kere cu lo por atende mas o menos 150 pashent.
Durante e gran dia aki a gradici tur cu a yuda realisa e proyecto enorme y exitoso aki. A firma tambe e entregamento oficial di e compleho cu Siemens. Despues e invitadonan por a admira e compleho nobo aki di paden y alabes haya un splicacion extenso di esnan cu ta labora den e compleho nobo. Pabien na ful comunidad pa cu e gran progreso den loke ta cuido medico na Aruba!