Home Sports Bubali a bataya Estrella na “Frans Figaroa” den un wega cu hopi...

Bubali a bataya Estrella na “Frans Figaroa” den un wega cu hopi implicacion

E encuentro aki di Estrella contra Bubali tabata un wega cu hopi implicacion, e interes di e fanaticada di e ekiponan aki tabata halto pero tambe cu hopi interes di por lo menos shete otro ekiponan cu ta den bataya pa clasificacion. Estrella ta luchando pa caba den top di tabla di e campeonato aki, mientras cu Bubali ta defendendio tur cu tur e di cuarto posicion riba tabla, p’asina clasifica pa play-off.

Den comienso caba por a observa cu Bubali a sali “full speed” den atake, cu hopi ofensiva. E agresividad di Bubali toch no a intimida Estrella, nan a para duro ey tras cu hopi pasenshi wantando atake tras di atake di e orguyonan di Nort, mas ainda cu Estrella a hunga e wega sin nan estelar defensor central y capitan Francois Croes, tambe sin e velocisimo Norvianel Naar y e hungado clave number 10, Phaedrick Baromeo, cu a cuminsa como suplente. Un movesion di “guts” di e director tecnico Arturo Charles cu asina a demonstra hopi confiansa den su cuadro. Estrella a wanta hopi den e prome mei ora di e prome tempo, asina mes Bubali a logra anota e gol pa habri marcacion den pia di Maurice Escalona despues di un pifia di e portero di Estrella na minuut 28, unda el a laga e bala los den ‘doelgebied’ p’asina permiti Escalona push’e bala over di linea pa gol di Bubali.

Estrella como un bon ekipo no a baha cabes, nan sigui traha mesun duro y ni dos minuut despues Hugo Robert den un atake relampago na man robes riba un defensor, cu el a gana ‘a base’ di puro velocidad y a los un tiro violento den careda crusando dilanti di e portero di Bubali den banda drechi di gol pa anota y duna Estrella e empate, net na e momento cu a spera cu un Bubali motiva lo a bay sigui domina e wega. Estrella a manda Bubali un mensahe skerpi cu e gol aki, cu nan no ta baha cabes pa nada, ta Bubali a baha nan intensidad un poco dunado Estrella mas iniciativa. Bubali di inmediato a purba recapacita hincando e stelar hungado hoben Ethan Tromp p’asina recupera e protagonsimo den e wega importante aki, por cierto algo cu a duna fruta di biaha permitiendo Bubali hasi algun atake peligroso pero sin concretisa, danki na gran parti tambe pa e hugada den gol di Jesus Fria cu a rebota den grandi pa salba su cuadro na varios ocasion despues di e pifia mas tempran den wega, esey ta caracter competitivo. E wega akinan anto a bay den un ‘toma y dame’ di banda pa banda , hopi bunita pa wak pero cu yen di tension. E wega ey a sigui te cu halftime a bay aden, un deleite pa e publico presente.

Despues di halftime nada un cambia, e wega a sigui cu mesun ritmo dinamico cu hopi yegada pa ambos oncena, Bubali cu mas dominio y yegadanan peligroso unda cu portero Frias a bolbe luci na hopi ocasion mes. Net ora cu hopi pensa cu Bubali lo bay anota atrobe y tuma bentaha, toch ta Estrella a probecha di un momento unda cu  David Dubero a los un tiro duro cu a dal den tubo di porteria pa cai net riba pia di Anwar Kock cu a sabi di probecha pa pone su ekipo ariba den marcacion, 2-1 na minuut 62. E entrada di Baromeo riba veld pa Estrella tambe a contribui na yegadan di mas calidad pa e naranhadanan di Santa Cruz na un momento di hopi necesidad. Te na pitaso final e wega tabata un toma y dame sin fin, Estrella a wanta y hasta por a aumenta nan bentaha, Bubali tabata kier pero no a logra, contra di un ekipo mane Estrella, un candidato grandi pa titula campeon e anja aki, toch nan tabatin nan merito, nan a bataya te na final.

Pitaso final, Estrella cu e victoria vital aki. Nos ‘man of the match’ ta bay pa Jesus Fria, kende a sabi di boltia un negativo tempran den un gran wega positivo y a salba su ekipo den hopi ocasion p’asina preserva e victoria riba Bubali. Estrella cu e tres puntonan aki ta comanda awor e tabla di clasificacion di division di honor cu 35 punto y un miho “doelsaldo” cu Dakota, sperando pa Nacional hunga nan wega di fecha 16. Bubali cu su derota ta keda cu 26 punto y ta hasi e careda pa e posicion cuater riba tabla mas interesante ainda, RCA y Britannia ta awo un punto so tras di e norteronan y Riverplate cu dos punto so patras pa asina purba conquista e posicion codicia ey. Lucha grandi ta biniendo den e ultimo dos siman di campeonato regular, keda pendiente!