Recientemente, Prome Minister Evelyn Wever-Croes a cuminsa reunionnan cu cada sindicato individual pa asina scucha di cada un e preocupacionnan cu ta biba bou nan miembrecia. Hunto cu stopsteward di Elmar, Prome Minister a reuni cu Sindicato STA. Y despues Prome Minister a reuni cu Sindicato di ABV di Hospital.
Den ambos reunion, e mandatario a splica e situacion financiero di pais Aruba y e retonan cu Gobierno nobo ta confrontando. A elabora riba e plan financiero di Gobierno y kico ta e plan pa sali for di e problemanan financiero cu Aruba ta den. Prome Minister a splica e motibonan tras di e Crisisheffing y a indica tambe e compensacionnan cu tin pa e clase laboral despues cu e Crisisheffing wordo introduci. Di parti di e sindicatonan, cada un a trece nan preocupacionnan dilanti.
SINDICATO STA:
Sindicato STA a enfatisa cu e instabilidad y malcontento na Elmar contra e director di Elmar ta hopi grandi. Esaki principalmente debi na e hecho cu e gerencia di Elmar no ta reconoce e Sindicato STA. Prome Minister a compromete pa intermedia den esaki pasobra tur sindicato cu gana un referendum na forma legitimo mester wordo reconoci.
SINDICATO ABV:
Sindicato ABV a elabora riba e preocupacionnan den cuido tanto na Hospital, INSAM como tambe na cas di nos grandinan na SABA. No solamente pa e trahadornan den e sector di cuido sino tambe pa loke ta trata e proyecto nobo di Hospital.
Na final di ambos reunion, tur e partidonan tawata hopi satisfecho cu e informacionnan comparti. Prome Minister ta bisa cu esaki ta e comienso di un serie largo di reunionnan cu lo intensiva e relacion entre sindicatonan y Gobierno.