Parlamentario Alan Howell Fraccion di POR lo presenta un mocion pa entrante 2019 bin cu un ‘gevaarspremie’ pa algemene y bijzondere opsporingsambtenaarnan

Miembro di Fraccion di POR, Alan Howell kende a concentra durante e rueda di prensa riba tema di tratamento di presupuesto 2018 y algun mocion cu e fraccion blauw lo entrega, a indica cu un di e mocionnan cu ta studiando actualmente ta uno cu no lo conta pa e presupuesto di 2018, sino cuminsando cu esun di 2019.
Fraccion POR kier mira un ‘gevaarspremie’ pa e algemene y bijzondere opsporingsambtenaarnan cu ta pone nan mes y nan bida disponibel tur dia pa defende nos pueblo. Howell ta referi akin a Douane Recherche, Polis, Brandweer, personal di KIA y trahadornan di CEA laborando na KIA cu hopi biaha nan bida ta na peliger 24/7.
E ta bisa cu si gobierno actual ta papia cu husticia ta un prioridad y cu nos tur lo desea un miho husticia na Aruba, e ora tin cu reconoce tambe cu tur e personanan aki cu ta poniendo nan bida na liña mester wordo reconoci como e personanan cu ta hacienda un trabou unda nan ta proteha pueblo. “A yega ora pa nos reconoce e personanan aki cu ta brinda e servicio y nan bida pa nos pais y dunanan un tipo di gevaarspremie”, Parlamentario Howell a expresa.
Pa loke ta e suma el a bisa cu ta studiando esaki y cu ta den conversacion cu e diferente departamentonan pa scucha nan feedback, pero en todo caso Fraccion di POR ta di opinion cu mester por bin cu un tipo di gevaarspremie pa e grupo di personanan aki.
Alan Howell ta considera cu esaki ta un bon momento pa introduci e premie aki pa asina tambe demostra na e grupo di personanan aki cu “nos tambe kiernan bon. Hopi biaha bo kier un bon producto, pero den e ser humano mes bo no ta inverti. Mi ta kere cu si e Gobierno aki ta bisa cu nos tin nos hendenan central, awel nos tin cu tene tur nos hendenan central den tur sentido”.