Un biaha mas e ex-lider di AVP, Mike Eman a haya ta bon di ataca MEP relaciona cu e intencion di e gobierno actual pa aumenta e BBO cu 1.5% y e BAZV cu 1% entrante 1 di juli proximo y tur esaki pa cubri e desaster financiero cu a ser hiba durante e ultimo 8 añanan. Debi cu Mike Eman te ainda no por hustifica e ruina financiero cu su gobierno a laga atras na final di 2017, el a bolbe cuminsa cu su recorido di mentira y manipulacion, caminda el a trece entre otro padilanti cu MEP ta un partido di medida y cu tabata e gobierno di AVP lo a elimina e 8.2% di Impuesto di solidaridad y e 7 ¾% di reduccion di salario di empleadonan publico cu a ser implementa na 1985 pa e ultimo Bestuurscollege di MEP.
Impuesto di solidaridad di 8.2%
Enberdad e tempo ey e medida aki tabata necesario y hustamente pa sanea e situacion financiero preocupante debi cu e refineria Lago a dicidi di cera su portanan na entrada di nos Status Aparte. Echo ta cu MEP como un partido responsabel a bin cu e ley di impuesto di Solidaridad di 8.2% y tambe reduccion di salario di empleadonan publico cu 7 ¾%, p’asina gobierno por haya e fondonan necesario pa maneha e pais aki na entrada di Status Aparte. E ley di 8.2% tabatin un duracion di solamente 2 aña (1986-1987) y ta termina despues di e periodo aki. Hecho ta cu durante campaña pa eleccion di 22 di November 1985, Henny Eman a demonisa e ley aki y tabata grita den tur skina di Aruba, cu asina cu AVP drenta gobierno na 1986, nan lo elimina e impuesto di solidaridad di 8.2% y tambe lo debolbe e empleadonan publico e 7 ¾% di salario. Hunto cu e promesanan aki, Henny Eman – para na un pomp di gasolin – a priminti di lo baha e prijs di gasolin y tambe lo duna gasolin pornada na e piscadornan.
AVP no a cumpli cu su promesanan
Sinembargo, kico nos a mira ora cu AVP a drenta gobierno na 1986? Ningun momento AVP a kita e impuesto di solidaridad di 8.2%, pero a keda djodjo cu esaki durante 2 aña largo te ora cu esaki a termina legalmente na fin di 1987. Y directamente despues di esaki, esta entrante 1988 e gobierno di Henny Eman a introduci un impuesto NOBO di 4.1% riba lomba di pueblo. Den total nan a haya un suma di mas cu 90 miyon Florin extra na impuesto den caha di gobierno p’asina nan por a sigui distribi y comete bagamunderia riba custia di pueblo. Fuera di esey, e gobierno di AVP na 1986 a haya 100 miyon florin di ayudo presupuestario (begrotingshulp) for di Hulanda y cual ayudo tabata un condicion di gobierno Hulandes mediante IMF pa Bestuurscollege di MEP implementa e medidanan necesario despues di ceramento di e refineria. Pues te hasta pa e 100 miyon florin di ayudo aki, partido MEP a percura pa Gabinete Eman por a haya na entrada di Status Aparte. Hende sa come lubida!
Tambe Gabinete Henny Eman no a debolbe e empleadonan publico nan 7 ¾% di salario manera cu nan a priminti, pero mester a warda te ora cu MEP a bolbe den gobernacion na 1989 pa cumpli cu e empleadonan publico debolbiendo nan e 7 ¾% di salario aki.
Cu e informacionnan veridico aki MEP kier a desbarata un biaha mas tur e mentiranan cu Mike Eman kier sigui ventila den pueblo despues cu el a tira serbete den ring dia 22 di September 2017. Mike Eman, un politico iresponsabel cu ta bay den historia como e destructor di un pais digno y respeta.