Oranjestad – Recien, Oficina di Turismo e tene su di 5 edicion di nan ‘Business Mixer’, un evento anual unda ta reconoce y reconecta cu socionan den e industria di turismo. Alabes ta comparti informacion di e aña cu a pasa como tambe loke por spera pa aña 2018 padilanti. Den un ambiente ameno den e centro di Oranjestad, na e sitio ‘Flor di Oriente’, e invitadonan a ‘toast’ hunto cu gerencia y personal di A.T.A., pa celebra e cooperacion fructifero.
A conta cu presencia di diferente miembronan di Parlamento, entre otro Presidente di Comite di Turismo di Parlamento, Setty Christiaans-Yarzagaray, Minister di Turismo Dangui Oduber, Minister di Educacion Rudi Lampe,como tambe Grace Koolman Secretario di Conseho di Minister. Ademas tawata presente CEO di AHATA Jim Hepple, CEO di AAA James Fazio, Director Di Aruba Ports Authority Jossy Figaroa, diferente invitadonan, hunto cu su staff y miembronan di ekipo di A.T.A.
CEO di Aruba Tourism Authority Ronella Tjin Asjoe-Croes a inicia su discurso gradiciendo un y tur presente pa e cooperacion duna durante e aña cu a pasa. El a sigui indicando cu e Business Mixer ta pa celebra exitonan pero tambe un pa refleha riba retonan cu a y ta presenta nan mes.
El a laga sa cu aña 2017 a cera exitosamente na unda entre otro e mercado principal pa Aruba, Merca, a mira e crecemento mas fuerte desde 2004 cu 11%.
E mercado di Latino America a mira un crecemento (ora exclui Venezuela), como tambe e mercado di Europa. Esaki a bay man den man cu un rendimiento fuerte den e sector hotelero; Aruba tawatin e indice mas halto di crecemento den Caribe den RevPAR. Tourism Receipts, registra pa Banco Central, a surpasa e meta stipula di un incremento di 1% y lo por ta serando anja cu un crecemento di 5%. Ademas di e exitonan aki, industria di crucero pa Aruba tambe a mira un incremento significante durante e lunanan cu ta conoci pa ta mas abao den turismo crucero. Tur esaki tawata delinea cu e obhetivonan strategico di A.T.A. pa 2017.
A.T.A. hunto cu otro socionan manera Banco Central di Aruba, AHATA, Aruba Airport Authority y Aruba Ports Authority a aplica un nivel di cautela ora di fiha metanan pa 2017, considererando e retonan cu e segundo mercado mas grandi pa Aruba su turismo, esta Venezuela lo trece cu n’e. Mientras cu Venezuela su bishitantenan pa Aruba a reduci, esaki no a impacta e ingreso y rendimento pa nos isla.
Alcontrario di esaki, e obhetivonan a surpasa e expectativanan. E horcannan cu desafortunadamente a impacta otro destinacionnan den region Caribense, a conduci na mas negoshi, pero mester subraya cu prome cu esey ya Aruba tabata goza di un desaroyo fuerte den 2017.
Durante su discurso, CEO di A.T.A. a comparti cu e proposito principal di Aruba Tourism Authority ta pa brinda prosperidad por medio di un desaroyo turistico sostenibel.
A.T.A. ta pone hopi esfuerso pa cu balansa e necesidadnan di e comunidad, e bishitantenan, e socionan y tur esaki dentro di e parametronan di un desaroyo sostenibel, unda ta balansa e aspectonan economico, social y di nos medioambiente.
Pa sigura beneficionan a largo plazo pa e industria turistico di Aruba, A.T.A. ta dirigi e demanda di e bishitante cu ta gasta y ta laga mas atras den nos economia, facilitando di otro banda un desaroyo debido di nos producto turistico, uno cu ta yuda aumenta e calidad pero tambe e experiencia cu e turista ta ricibi durante su bishita na nos isla. CEO di A.T.A. a pone hopi enfoke riba e aspecto aki indicando entre otro cu esaki ta responsabilidad di un y tur, incluyendo sector publico y priva. A.T.A. tey pa asisti.
Diferente topico a wordo comparti durante e Business Mixer y Ronella Tjin Asjoe-Croes a finaliza e evento, gradiciendo un y tur –no solamente pa nan presencia y atencion, pero pa nan bon cooperacion den e industria di turismo pa Aruba cu ta nos pilar economico principal.