86
Willemstad, Korsou: Diadomingo den oranan trempan di marduga, a tuma lugar accion riba laman den e e area pazuid di Klein Korsou.
E avion di Warda Costa den cooperacion cu e Sentro di Reskate i Kordinashon, a detecta un boto sospechoso.
Mesora e Super-RHIB a ranca sali y a bin topa cu un boto cu tres persona abordo. Durante cu nan tabata controlando den e boto a bin topa cu 81 kilo i 775 gram (81.775) di cocaina i dos kilo i 140 gram (2.140) di marihuana.
E tres hombernan abordo a keda deteni y tur tres ta di nacionalidad Venezolano. Nan a wordo hiba na e ‘steunpunt’ di Warda Costa na Parera. E lancha y e droga abordo a keda confisca pa autoridad. E tres sospechosonan a wordo pasa pa departamento di narcotica di Polis, pa asina continua cu e investigacionnan.
Na mesun momentu ku e accion tabata tumando lugar, na Klein Kòrsou, e avion Dash a detecta un otro lancha den becindario di Bullenbaai. Riba indicacion di e Sentro di Reskate i Kordinashon, otro Super-RHIB a sali y a topa cu un lancha cu 41 persona abordo, tur di nacionalidad Venezolano, cual 35 homber y 6 muher.
Mesora a trece e lancha na e steunpunt na unda tur e 41 personanan aki despues di a listra nan a pasa nan over pa Polis.
E investigacion a sigui riba tera den e casonan aki, polis a bai den área di Kaya Seru Machu unda e Tim di matenshon di òrden Públiko a para dos vehículo y a detene 6 hòmber sospechoso, respectivamente:
1. F.O.Z. di 64 aña
2. E.A.Z. di 41 aña
3. J.A.L. di 36 aña
4. M.D. di 26 aña
5. A.F.B. di 16 aña
6. A.A.J. di 19 aña
Tur naci na Kòrsou.
Tur 6 sospechoso mester a presenta dilanti di un Fiscal Auxiliar.
Polis a topa cu dos rifle , esakinan y ambos vehiculo a keda confisca, pa mas investigacion. E investigacion den e caso aki ta continuá.