ORANJESTAD –Presupuesto 2017 incluyendo e cambionan proponi door di Gabinete Mike Eman II lo a fiha e prome paso pa un reduccion di debe di pais Aruba. Presupuesto di aña 2018 lo a resulta den un presupueso cu pa prome biaha e entradanan lo a surpasa e gastonan cu 25 miyon di florin. E surplus aki di +0.5% di GDP, segun e ley di supervision financiero temporal, lo a wordo destina pa reduccion directo di debe.
Nos por a nota cu Gobierno actual lo a presenta inicialmente un presupuesto 2018 cu unda e gastonan ta 190 miyon di florin mas cu e entradanan, esta un deficit di -3,9% di GDP aumentando asina e debe di 82% pa 91%.
CAFT a urgi e gabinete actual pa yega na un deficit rond di -3% dor di scrutina e maneho nobo criticamente. “Asina mes cu un presupuesto modifica e gabinete actual tin 175 miyon di florin extra na su disposicion pa gasta, mas 130 miyon cu nan no tin nodo di compensa di 2017 y cuater aña adicional cuminsa reduci e debe,” sr. Richard Arends, parlamentario pa fraccion di AVP den Parlamento a splica.
“Pa aña 2018 e maneho nobo ta wordo financia dor di e ‘crisisheffing’ cu a wordo anuncia: 1% BAZV y 1,5% BBO pa paga pa proyectonan PPP,” Sr. Arends a splika.
E pakete di medida ta genera 60 miyon di florin pa e fondo di seguro medico.
“Di manera aki Gobierno ta crea un espacio financiero di 60 miyon di florin pa ehecuta su maneho, pasobra e landsbijdrage pa AZV, ta baha e mesun suma”. E suma cu mester paga na proyectonan infrastructural y urbano ta 38 miyon di florin, segun e conseho di CAFT. “Pakico mester ranca 90 miyon di florin e ora di pueblo cu e aumento di BBO?” ta preguntanan valido cu Parlamentario Sr. Richard Arends a hasi den direccion di Gobierno.
“E hecho cu e debe a yega te 82% na 2017 tabata premira den e normanan stipula y e condicion cu e lo reduci a partir di aña 2018,” Arends ta bisa. “E tabata e opcion adecua pa yega na finansas publico sostenibel sin causa disturbionan economico, laboral of social.”
E ta bisa tambe cu falta di crecemento den economia a pone mas presion riba e desaroyo aki. “Gobierno nobo tin den su man pa mantene su mes na e normanan palabra y sigui cu e maneho financiero cu a wordo hiba den e ultimo añanan, logra un surplus y aloca esaki pa reduccion di debe. Sinembargo ta opta pa hiba un maneho expansivo unda ta hiba e deficit bek na nivel di aña 2015-2016, posponiendo e reduccion di debe y pasa e cuenta di esaki pa pueblo”.
“Nos sa cu tanten cu Gobierno tin un deficit den su presupuesto, Gobierno mester fia placa pa cubri esaki,” Parlamentario Arends ta splica. Den e añanan anterior a logra cumpli cu e normanan ancra den ley pa cu e presupuestonan di añanan 2015 (-3.7%), 2016 (-2.0%) y 2017 prome cu esaki a wordo ahusta pa gobierno nobo (-0.5%) sin ningun facilidad of asistencia externo.
Un maneho financiero stringente unda nos a sa di reduci e dificit gradualmente sin causa disturbionan economico, laboral of social. For di aña 2014 nos ta papiando aki di un reduccion di deficit di casi 500 miyon florin te cu 2017 prome cu e deficit di e presupuesto aki a wordo aumenta artificialmente door di e Gobierno actual.