Ya ta algun dia caba cu contrincantenan politico di e gobierno actual ta treciendo criticanan destructivo padilanti pa loke ta e celebracion di Arubadag 2018 na Hulanda, insinuando entre otro cu un avion completamente yen lo a bay Hulanda pa celebra e gran dia aki. Sin duda cu esaki ta un di e tantisimo actonan di desesperacion di partido AVP, kendenan ta biba kere cu e gobierno actual ta mescos cu nan, esta cu nos ta derocha placa di pueblo sin tin hustificacion pa esaki manera cu nan a haci durante nan gobernacion di 2010-2017.
Arubadag den añanan 80
E celebracion di Arubadag na Hulanda mes no ta algo di awo, pero ta data for di cuminsamento di añanan 80 tempo cu nos Libertador Betico Croes a introduci e celebracion aki y p’asina trece tur nos Arubianonan biba na Hulanda hunto pa den forma familiar pasa un rato ameno y p’asina fortifica e lasonan di amistad entre nos Arubianonan. E tempo ey algun banda musical y grupo di baile di Aruba so tabata bay Hulanda pa entretene nos hendenan riba e dia special aki, esta e celebracion di nos himno y bandera.
Gastonan limita
E gobiernonan di MEP a sigui cu e tradicion aki pero semper den forma financieramente responsabel, caminda un cantidad limita di bandanan musical tabata ser manda pa Arubadag. Alavez durante e añanan 2002-2009 nos ex-Premier Nelson Oduber, pa limita e gastonan di viahe, na dos ocasion so a bay Hulanda pa asisti na Arubadag y tur e otro biahanan el a percura pa graba su mensahe pa e Arubianonan biba na Hulanda y laga pasa esaki riba pantaya grandi durante e evento pa tur esnan presente mira y scucha.
Arubadag 2017
Sinembargo nos por a mira con durante e gobernacion 2010 pa 2017 di sr. Mike Eman, su persona y un gran cantidad di su ministronan tur aña y sin falta ningun, tabata hiba un gran cantidad di banda y gruponan musical, MC y tambe coordinadornan pa celebra na grandi e Arubadag na Hulanda. Aki si por papia di avion yen cu tabata bay Hulanda durante gobernacion di AVP. Por ehempel pa e Arubadag di aña pasa, Mike Eman a percura pa hiba e siguiente banda y gruponan: Tsunami, Buleria, Jeon & Friends, Nfusion, Sound & More, Dj Nutzbeats (coordinador di Mike), Trio Huasteca, Tipico Cadushi Largo, Grupo di baile tipico, Datapanik di Michael Lampe (candidato di AVP) y un brassband. Pues den total 8 banda y 2 grupo.
Arubadag 2018
Pero awor cu ta bay e celebra e Arubadag 2018, diripiente e AVP-istanan ta cuestiona e cantidad di banda cu lo bay entretene nos rumannan na Hulanda. Hecho ta cu e bandanan cu e aña aki lo bay Arubadag ta hopi limita compara cu esun di Arubadag di aña pasa. Esakinan ta: Buleria, Tsunami, Grupo di Betico, Grupo Sabor (di Arubianonan biba na Hulanda), Jacobs steelpan show, Massive Brass (mita di e grupo ta residencia na Hulanda) y Grupo di baile A Touch of Aruba. Den total 2 banda y 3 grupo.
Pues asina nos por mira con e gobierno actual ta percura pa limita e gastonan pa loke ta e celebracion di Arubadag 2018 na Hulanda, contrario na e deroche di placa di pueblo cu a sosode bao di gobernacion di AVP, caminda ‘the sky is the limit”.