ORANJESTAD, Aruba – E prome dos lunanan di aña 2018 a resulta di ta hopi positivo pa locual ta trata turismo di Aruba. Den luna di januari 2018 Aruba a yama bon bini na un total di 91, 471 bishitante “stay-over” cu ta nifica un crecemento di 2.5% compara cu e mesun luna di e aña anterior. Pa luna di februari e cifra nan ta indica cu 85,017 turista “stay-over” a bishita Aruba, pues un crecemento di 1% compara cu 2017.
Turismo “stay-over”
En comparacion cu aña 2017 pa locual ta trata turismo “stay-over” por wak cu turismo procedente di Merca a subi cu 7.4% den januari y 7.5% den februari. Canada a subi cu 16.1% den januari y 8.2% den februari, Colombia a baha cu 5.0% den januari y ta bolbe baha cu 1.4% den februari. Brazil ta subi cu 30.73% den luna di januari y 29% den februari. Argentina a subi cu 33.7% den januari y den februari por wak un crecemento di 9.2%. Europa ta conose un crecemento di 6.2% den januari y 5% den februari. Ta importante pa menciona cu pa e luna di januari 2018 Argentina ta reemplasa Venezuela como e mercado Latino Americano di mas grandi.
Pa locual ta trata e continente Norte Americano por wak un total di 66,727 bishitante cu ta nifica un crecemento di 8.3% pa luna di januari. Pa februari e cifranan ta indica cu 67,431 turista di Norte America a bishita nos isla cu ta nifica un crecemento di 7.6% compara cu februari 2017.
Pa Sur America por wak 14,917 bishitante den januari 2018, pues un reduccion di 18.1% compara cu e aña anterior. Pa februari 2018 Aruba a yama bonbini na 9,255 bishitante di Sur America cu ta un reduccion di 29% compara cu 2017. Venezuela ta representa e caida mas drastico den cantidad di bishitante di Sur America. Esaki ta debi na e problemanan politico y economico cu ta sigi escala na e pais. E impacto di e crisis di Venezuela ta ser parcialmente conteni door di e crecemento di Argentina.
Bishitantenan procedente di Europa pa januari 2018 ta 7,284 cual ta nifica un crecemento di 6.2% compara cu 2017. Pa februari Aruba a ricibi 6,248 turista di Europa, un crecemento di 5.0%.
Turismo crusero
Pa luna di Januari 2018 Aruba a yama bon bini na 108,298 pasahero crusero. Esaki ta 18,564 pasahero mas cu e aña anterior, pues un crecemento di 20.7% compara cu 2017. Un total di 53 barco crusero a drenta Aruba compara cu 44 di aña 2017, un crecemento di 20.5%.
Pa februari 2018 nos por wak cu 99,303 pasahero crusero a bishita Aruba. Esaki ta 8.6% mas cu den 2017. E cantidad di barco crusero cu a drenta Aruba den luna di februari a subi cu 7.9% di 38 pa 41 compara cu 2017.
Hotel
Segun Aruba Hotel and Tourism Association e averahe di ocupacion di camber pa januari 2018 a subi cu 4.4% en comparacion cu januari 2017. Pa februari 2018 e averahe di ocupacion di camber a subi cu 3.9% compara cu februari 2017. E cifra total di camber nan ocupa pa anochi a subi cu 5.4% den januari y 3.4% den februari. Pa locual ta e “Average Daily Rate” por wak un crecemento di 10% den januari 2018 compara cu januari 2017 y 8.5% den februari 2018 compara cu februari 2017. Consecuentemente e Revenue Per Available Room ta crece di USD 256,42 den januari 2017 pa USD 296,77 den januari 2018, un crecemento di 15.7%. Pa februari 2018 e RevPar ta subi di USD 279,56 den 2017 pa USD 316,77 den 2018, un crecemento di 13.3%. E indicadornan di e sector hotelero ta duna un indicacion cla
Economia
Tur indicador a demostra di ta sumamemnte positivo pa luna di januari y februari 2018. Esaki ta ilustra cu turismo ta contribui grandemente na economia di Aruba. Turistanan di calidad ta yegando Aruba y esaki ta cuadra cu e vision di Minister di Turismo. E anja aki lo ta un tremendo anja pa loke ta trata turismo y minister Dangui Oduber ta hopi contento di e performance den nos turismo.