E decision di gobierno pa permiti negoshinan keda habri te cu 12’or di anochi, lo bay percura pa situacionnan laboral cu gobierno tin cu tuma na consideracion pa sigura cu derecho laboral di e trahadonan, no ta wordo perhudica.
Miembro di partido AVP, mr. Carl Giel a mustra cu e cambio di orario aki lo crea cierto situacionnan cu mester wordo analisa y atendi, pa asina e trahadonan no haya nan mes den incertidumbre.
“E parti laboral den e decision di gobierno aki, ta sumamente importante y bayendo caba riba e parti caminda e cantidad di placa cu ciudadanonan eigenlijk mester a aporta na comercio, ta baha a base di e medidanan implementa pa gobierno. Esaki na su turno ta bay pone cu negoshinan no ta bay haya e cantidad di placa necesario pa bay paga extra trahadonan, si nan lo keda habri te cu 12’or di anochi.
Kisas e minister a premira cu e decision aki lo bay crea cuponan di trabou nobo, cual lo no resulta den esaki, pa motibo cu e cantidad di placa cu lo bay wordo gasta den e negoshinan aki lo baha, a base di impuestonan, a base di medidanan implementa.
Loke ta bay pas den e caso aki, comerciantenan ta bay purba rek e orario di mesun trahadonan cu nan tin, posiblemente nan ta bay laga e trahadonan traha oranan extra y esaki por conduci na abusonan y efecta tambe e parti di derecho laboral di e trahadonan.
Por haya cu trahadonan ta bay traha oranan extra y kisas nan lo no bay haya pago pa e orarionan extra aki y eynan por bay haya cu abusonan laboral lo ser cometi.
Mi kier a haci pregunta na Minister di Labor si el a premira e efecto di e decision aki di e aumento di orarionan cu e negoshinan ta bay wordo habri, ki efecto esaki ta bay tin riba e parti di abusonan laboral, kico ta su plan pa bay contra aresta esaki.
Mi tin otro pregunta tambe riba e desaroyo aki pa minister di husticia ya cu manera cu nos tur sa, e negoshinan aki ta bay keda habri te cu 12’or di anochi y hopi biaha delincuentenan ta haci uzo di e scuridad di anochi pa comete nan actonan contra ley.
Den e csonan aki ta bay haya cu tin trahadonan lo bay cas lat, por ehempel nan ta bay sali 11’or of 12’or di anochi, comercientenan ta bay sali cu placa durante e oranan aki y esaki den pasado caba a causa cu a bin un aumento den atraco y otro tiponan di abuso di comerciente y trahadonan.
Pa es motibo aki mi ta haci mi pregunta na minister di husticia, si su persona a premira un aumento di atraco riba e trahado- y comerciantenan aki y kico su plan ta pa contra aresta esaki tambe.
Pues aki por mira c’un decision di un minister ta bay causa efecto na diferente areanan den nos comunidad y den e caso aki, e lo bay afecta e parti laboral, e lo bay afecta e parti social y e ta bay afecta e parti di siguridad di nos ciudadanonan tambe.
Pues preguntanan cu mi tin pa si e ministernan concerni ta na altura di e consecuencianan di e decision aki, si tin un plan cla pa cotra areseta esaki.
Gobierno a mustra cu e tin e hende central pero cu e tipo di decisionnanaki, e ta mustra cu esaki no ta e caso ya cu si hende ta central, gobierno mester a tuma tur aspecto di interes pa esunnan mas debil den comunidad, manera pensionadonan y esunnan cu ta cobra salario minimo,” mr Carl Giel a declara.