Diaranson 30 di mei na Arubahuis na Hulanda, Prome Minister Evelyn Wever-Croes a lansa District 297. District 297 ta un plataforma nobo cu e meta pa uni Arubianonan cu ta biba den exterior y tambe envolve tur Arubiano den exterior den e plan di innovacion y modelo di crecemento economico pa nos pais. Un cantidad di studiantenan y invitadonan a bin hunto pa e lansamento importante aki na unda Prome Minister a duna un discurso hopi detaya di loke ta e plan di Gobierno pa tur nos hendenan cu ta biba den exterior. Prome Minister a elabora asina aki:
“E ta yena mi cu orguyo pa wak asina hopi talento Arubiano hunto den un sala. E ta un honor y placer pa por tin boso cada un hunto awe nochi na Arubahuis pa lansa nos iniciativa nobo District 297.
District 297 ta referi na e hecho cu unda cu bo por ta na mundo bo ta forma parti nos isla, Aruba. Un plataforma nobo pa uni nos Arubianonan cu ta biba den exterior y envolve nan den nos plan di innovacion y modelo di crecemento nobo pa nos pais.
District 297, lo crea un plataforma pa Arubianonan rond mundo pa uza nan capacidad intelectual y talentonan pa trece ideanan innovativo pa cu desaroyo di nos pais.
Ademas di esaki, e plataforma lo crea un oportunidad pa talentonan Arubiano por profila nan mes y exhibi nan logronan den e arena internacional.
Y mas imporante, e plataforma digital di District 297, lo conecta Arubianonan bibando den exterior cu of fundacionnan social na Aruba cu lo por uza nan capacidadnan y talentonan pa por colabora riba diferente proyectonan.
Pa medio di e plataforma aki nos lo crea un ‘database’ di Arubianonan y nan capacidadnan pa efectivamente por conecta nan cu oportunidadnan na Aruba. Ademas di esaki nos lo por haya un bista di kico lo por ta e careranan di futuro na nos isla.
Nos plan di accion pa e aña aki lo enfoca riba e diseño di nos plataforma digital y envolve nos comunidadnan akinan na Hulanda y Merca. Nos lo lansa y organisa diferente ‘Think-Tanks’ y ‘Hack-a-thons’ pa por encurasha ideanan nobo di nos hendenan bibando den exterior. Nos lo lansa tambe e prome fase di nos plataforma digital. Pa 2019, e plan ta pa lansa nos plataforma digital completo y cuminsa crea lasonan entro Arubianonan den exterior y oportunidadnan na Aruba. Y tambe activa nos comunidadnan Arubiano bibando den otro regionan.
Y finalmente pa 2020, nos meta ta pa nos por mira e prome productonan of frutonan di District 297 bek na Aruba. Arubianonan pa medio di e plataforma aki cu a logra crea lasonan cu oportunidadnan nobo na Aruba of problemanan local cu a wordo soluciona cu boso aporte.
Tambe e plataforma aki lo por crea un oportunidad pa otro islanan den region pa uza Aruba como ehempel y implementa un proyecto similar den nan contexto. Asina aki nos ta bay ta exportando conocemento y crea un nomber pa Aruba den innovacion di isla chikito, asina yama SIDS.
Nos vision pa Aruba ta pa crea un isla lider den innovacion y conoci rond mundo pa su desaroyo duradero. Asina aki crea un economia fuerte cu por enfrenta cualkier reto. Trahando hunto, innovacion lo mehora productividad y lo ta e motor tras di e desaroyo socio-economico.
Nos isla ta pasando den retonan grandi. Pero ningun di e retonan no ta un cu nos no por soluciona. Aruba mester di boso awe mas cu nunca. Nos mester di boso ideanan. Boso capital intelectual, boso capital social y ni maske con chikito boso contribucion ta, e ta conta. Den union nos por surpasa cualkier reto y sali un pais mas fuerte cu un deserayo ehemplar pa otro islanan den nos region”.