Amsterdamstraat, San Nicolas: Diaranson pa mas o menos 1’or y mey di marduga, polis y brandweer ta wordo manda cu urgencia na e adres, Amsterdamstraat 2, pa motibo cu e cas ta completamente na candela.
Na yegada nan ta topa enberdad cu e tabata completamente na candela, e huma por a wordo mira for di leu riba e caminda prinicipal. E doño di e cas a bisa polis, cu nan a sali un rato for di cas pa bay pone gasolin den nan auto y a laga nan yiunan drumi. Ora nan a bolbe bek cas, e cas tabata full na candela. E desorden di e candela feros a lanta e yiunan for di soño cu nan por a core sali pafo.
Den e cas no tabata tin niun hende, den e cura tabata tin varios auto y e botter di gas cu mester a wordo desconecta, na yegada di brandweer nan a desconecta e botter di gas y hopi liher a logra domina y paga e candela.
E motibo di e candela te na e momentonan aki ta desconoci, e doño di e cas kemen cu no tabata tin nada cu lo por a causa e candela aki.
Segun nos a compronde cu e candela a cuminsa den e camber dilanti, mirando cu tin hopi hende bibando den e cas aki, den e camber ey tabata tin varios corchon y paña.
E cas a kima por completo, e autonan den e cura a haya varios daño y e famia a perde tur cos for di den e cas, e unico cos cu nan a keda cune ta e pañanan cu nan tabata tin bisti.
Presencia di slachtofferhulp a word pidi, e muchanan a wordo hiba Centro Medico pa un control.