Falcon, Venezuela: Un di e tankinan den cual ta deposita restonan di crudo, di e refineria mas grandi di Venezuela Amuay, a bay over y a basha bay den e bahia cu ta keda cerca di e refineria. Varios tankero y boto tambe a keda mancha na petroleo, asina dos trahador y un lider sindical a duna di conoce.
E derrame di e pos a wordo ocasiona pa dos dia tras di otro di yobidanan hopi fuerte y tambe pa falta di mantencion di e refineria, esaki e representante di e trahadornan Ivan Freites a duna di conoce.
E tankeronan mancha na crudo, no ta wordo permiti pa nabega den awanan internacional, paso nan por genera contaminacion. NI PDVSA, ni E Minsterio Petrolero no ta dunanndo informacionnan cu a wordo pidi.
Freites a bisa, cu te na e momento aki no ta conoci cuanto crudo a bay perdi, pero mas sigur ta trata den careda di un 200 mil bari di crudo, tambe ela confirma cu tin botonan tranca cu no por sali for di Venezuela paso nan a wordo mancha pa e petroleo y esaki tin e capitannan basta indigna.
” El Fors 1″ asina yama e pos cu a bay over, den e pos aki nan ta deposita e productonan pisa cu no ta specifica of ta dimas.
“Un desaster na PDVSA, awe durante dia a bolbe ocuri un derrame pa falta di mantencion di e refineria Amuay, cu consecuencianan Ecologico y economico hopi desastroso”, asina Maria Corina Machado a expresa, kende ta coordinadora nacional di e movimento político Vente di Venezuela.
Te na e momentonan aki no tabata tin niun reacion oficial di parti e Gobierno venezolano.
Arubanative.com a tuma contacto cu oficina di calamidad, pero nan mes no a haya niun notificacion di e derrame aki ainda y naturalmente no lo por duna informacion si esaki lo por yega te den nos awanan teritorial, mirando cu e refineria Amuay ta keda basta cerca nos isla.
Manera nos haya cualke update nos lo publica esaki.