ORANJESTAD – DAO ta anuncia cu cuminsando 29 januari 2024 tur invita tur dunado di trabou pa participa den un encuesta digital relaciona cu nan experiencia como dunado di trabou, particularmente nan experiencia trahando cu hobennan riba e mercado laboral. DAO ta reconoce cu dunado di trabou ta duna un aporte substancial riba e mercado laboral.
E obhetivo di e investigacion aki ta pa haya un bista mas amplio di e experiencia di dunadonan di trabou cu e grupo di hoben disponibel riba e mercado laboral. Esaki ta encera hoben di 15 pa 24 aña di edad, y tambe e hoben adulto di 25 pa 29 aña di edad riba e mercado laboral di Aruba.
E investigacion aki ta encera compilacion di informacion riba entre otro e proceso pa recluta y empleo di e hoben trahado for di bista di Aruba su dunadonan di trabou. Cu e datonan aki, por desaroya of ahusta maneho na un forma cu ta ‘evidence-based’ y implementacion di maneho por ta mas dirigi pa cu nos hobennan. E datonan aki ta yuda identifica e areanan di nos mercado laboral unda cu tin cierto discrepancia relaciona cu e oferta y demanda pa trahado hoben y ta fungi tambe pa determina e desafionan relaciona cu desempleo bou hobennan. Pa e hobennan mes, e datonan aki lo ta un contribucion pa mehora nan perspectiva riba e mercado laboral y nan preparacion nan pa ta exitoso den trabou den futuro.
Nos ta pidi encarecidamente pa participa na e encuesta aki cu lo tuma mas o menos 10 minuut di bo tempo. Aki bou por haya e linknan pa participa.
Version na Hulandes di e encuesta
https://www.surveymonkey.com/r/SWTS2024NED
Version na Ingles di e encuesta
https://www.surveymonkey.com/r/SWTS2024ENG
Participacion den e investigacion aki ta completamente boluntario. Lo publica tur informacion y datonan ricibi publica na forma agrega, asegurando proteccion di identidad di e dunado di trabou. Pa mas informacion tocante e encuesta, por tuma contacto cu Bureau Arbeidsmarktonderzoek, na 5237720 of por manda un email pa [email protected] of [email protected].
Nos ta gradici bo pa bo tempo y boluntad pa contribui na e investigacion importante aki. Bo empresa su participacion ta aporta grandemente na e desaroyo di maneho laboral como tambe intervencionnan pa mehora oportunidadnan di empleo pa hobennan. Nos ta pidi bo cooperacion pa completa e encuesta prome cu 28 februari 2024.