Kaylee – Sue ta e prome atleta hoben Arubiano cu lo competi contra e mihonan di mundo den e campeonato mundial di powerlifting.
ORANJESTAD: Diamars mainta, Minister Endy Croes a ricibi bishita di e hoben atleta Kaylee – Sue Danies. Kaylee – Sue ta di vacacion na Aruba y pronto lo regresa Groningen, Hulanda pa finalisa su estudio. Tambe, Kaylee – Sue ta practica e disciplina di powerlifting. Recientemente, Kaylee – Sue a competi den e competencia internacional di powerlifting Benelux Cup. Aki Kaylee – Sue a conkista e titulo Best Female Lifter den e categoria 62.6 kg. Kaylee- Sue a logra haci 9/9 lifts. Esaki ta significa cu Kaylee – Sue a logra tur su intentonan. Cu esaki Kaylee- Sue a logra clasifica pa World Classic Open Powerlifting Championship y European Open Classic Powerlifting Championship. Kaylee – Sue ta e prome atleta hoben Arubiano cu lo competi contra e mihonan di mundo den e campeonato di powerlifting. Kaylee – Sue ta den ful preparacion pa e dos competencianan grandi aki. Durante e encuentro, Kaylee- Sue a conta mandatario di Deporte di su preparacion, entrenamento y nutricion pa e proximo competencia internacional. Durante e bishita na Bestuurskantoor, Minister Endy Croes a entrega Kaylee – Sue un medaya como muestra di admiracion pa su logro y su contribucion den e desaroyo di deporte. Pa conclui, Minister Endy Croes ta felicita Kaylee- Sue cu e logro aki y ta dese’e hopi exito den su estudio y su proximo competencianan internacional. Aruba ta orguyoso di bo! Cu deseo, disciplina, determinacion y dedicacion ta logra.