Un estudio recien realisa pa e Instituto di Investigacion di Stress di Universidad di Estocolmo a duna resultadonan sorprendente tocante e relacion entre soño y salud di curason. Na contrario di loke hende ta kere, e hayazgonan ta sugeri cu drumi te laat riba fin di siman no solamente ta beneficioso, sino cu por ta un medida preventivo pa atakenan cardiaco.
E investigacion ta a base di datonan recopila di mas cu 44,000 adulto sueco na 1997. E cientificonan a sigui nan pa 13 aña y a topa cu tin un relacion significante entre falta di soño durante siman y tasanan mas halto di mortalidad, specialmente pa malesanan di curason.
E adultonan cu tabata drumi constantemente cinco ora of menos durante siman tabatin mas chens di fayece (specialmente pa malesanan di curason) durante e 13 añanan siguiente cu esnan cu tabata drumi minimo siete ora.
Pero, e conclucion mas interesante ta cu esnan cu ta compensa nan falta di soño durante siman cu un periodo di soño mas largo riba fin di siman ta experencia un reduccion significante den riesgonan asocia cu malesanan di curason. E resultadonan ta indica cu soño cortico durante siman no ta representa un factor di riesgo pa mortalidad si ta combina cu un periodo di soño medio of largo riba fin di siman.
E investigadonan a menciona: “E resultadonan ta implica cu e soño cortico durante siman no ta un factor di riesgo pa mortalidad si ta combina cu un periodo di soño medio of largo riba fin di siman. Esaki ta sugeri cu e falta di soño durante siman por keda compensa riba fin di siman, y esaki tin consecuencianan riba mortalidad”.
E hayazgonan aki ta ofrece un perspectiva nobo tocante e importancia di soño y ta papia riba e posibilidad cu ahusta nos habitonan di soño riba fin di siman por tin beneficionan significante pa salud a largo plazo, specialmente den prevencion di malesanan di curason.