Arub – ELMAR a habri su porta pa comunidad pa un Open Dag memorabel teni riba 25 di November. E evento, organisa pa empleadonan boluntario, a marca un ocasion importante unda e compania a mustra su trabou. E Open Dag ta un compromiso di ELMAR pa envolucra e comunidad Arubano.Tur bishita tabata tin e oportunidad pa interactua cu e Team di ELMAR, haci preguntanan, haya conocimento tocante consumo di energia, distribucion di coriente y practicanan di seguridad. Un danki di curazon ta bay na tur e mayornan cu a trece nan yiu pa participa den e experiencia educativo aki.
Un di e momentonan cu a sobresali durante e evento tabata e booth di demonstracion di Meter & Connections, unda bishitantenan a keda asombra di descubri e gran diferencia den uzo di energia entre aparatonan di uzo diario. Nan a presencia e comparacion entre e consumo di un blow dryer (13 amper) y e uzo minimal di un luz LED (1-2 amper). Mediante e smart meters di ELMAR a laga e bishitante ta mas consciente tocante nan habitonan di consumo di energia.
Un otro momento memorabel a tuma luga na e booth di demonstracion di Overhead Lines, unda lineman di ELMAR a participa den un competencia di subi pole di coriente, mustrando nan experiencia den e metodo tradicional uzando harnas y spoor pa sibi y colga na e poste di coriente.
E booth di demonstracion di Underground Cables y Grid Quality Management a duna demonstracion di un kabelstoring y un bista di e consecuencianan cu un kabel por sufri door di causa tercero. A demonstra un kabel un persona dal un kabel cu piek cu no a causa interupcion inmediato, pero si daño na e kabel unda cu despues di tempo door di awacero y vocht cu a drenta kabel na e area afecta a causa un kabelstoring.
Un tributo special a wordo dedica na “100 Aña di Distribucion di Energia na Aruba” atraves di un exhibicion pa sr Steve Francees, detayando e trayecto historico di distribucion di energia riba nos isla. E exhibicion informativo aki a conmemora e evolucion y progreso di distribucion di energia na Aruba.
“Nos ta sumamente agradecido na nos empleadonan, colaboradornan, mayornan y comunidad pa nan apoyo y participacion den haci nos Open Dag un experiencia notabel. Ta un privilegio pa nos sirbi e comunidad Arubano y eventonan manera esaki ta subraya nos compromiso pa transparencia, educacion y innovacion den distribucion di energia,” Anthony Irausquin, Director di ELMAR a vocefera.
ELMAR ta yama un danki na tur persona cu di un of otro forma a contribui na e relansamento di e Open Dag di ELMAR. Nos ta desea di extende un danki especial na e comitee organisador cu a traha duro pa organisa e Open Dag, nan esfuersonan ta wordo aprecia grandemente pa nan dedicacion. ELMAR lo continua cu e iniciativa aki den futuro, esaki ta e prome paso pa continua cu mas Open Dag pa sigui envolucra e comunidad Arubano y duna tur bishitante e oportunidad pa interactua cu e Team di ELMAR.
