ORANJESTAD: Durante biahe di trabou na Merca, Minister di Enseñansa y Deporte Endy Croes a bishita un stadion masha grandi mes cu ta di e ekipo di South Carolina Gamecock, esta Williams-Brice Stadium. A construi e stadion aki na aña 1934 y tabatin e capacidad di carga 17,600 fanatico. Den transcurso di e añanan, a keda expande e stadion y aumenta e capacidad di e stadion. Actualmente, Williams-Brice Stadium tin e capacidad di carga 77 mil persona. Den cuadro di e acuerdo cu a firma recientemente, unda ta brinda ocho (8) of dies (10) studiante e oportunidad pa haci nan Master’s Degree den Sport & Event Management, Minister Endy Croes a haci e recorido na e stadion pa por haya mas conocemento di e proyecto aki. Minister Endy Croes a indica cu e ta contento cu e gerencia cu a ricibi nan y duna splicacion di cada faceta di e stadion, entre otro, e “press booth”, e cambernan, con nan ta reparti e stoelnan durante wega, etc. Minister Endy Croes a indica cu nan a adkeri bastante informacion durante e bishita aki y a crea contacto nobo. Esaki sigur tabata un experencia unico, unda cu a haya hopi concocemento cu por aplica pa Aruba y contribui den desaroyo di “sport tourism” na Aruba.