Pastor mexicano condena na 37 aña di prison pa abuso sexual

MEXICO: Na Mexico, un pastor di un culto religioso a haya 37 aña di prison pa a abusa sexualmente di cuater muher, algun di nan menor di edad. Esaki a sosode na Nuevo Leon.
Fiscal General a duna di conoce e resultado di e audiencia di e huicio penal cu a sentencia e religioso, identifica como Jonathan Armando ‘N’, di 39 aña di edad.
Por medio di testimonionan y otro evidencianan, documento, investigacion, pruebanan di doctor y testnan psicologico a permiti comproba responsabilidad di e religioso. ‘N’ a wordo haya culpabel di delitonan manera violacion, intento di violacion y abuso sexual.
Ademas di e condena di 37 aña di prison, e tambe mester paga pa dañonan causa na e victimanan. E sucesonan a tuma lugar entre 2015 y 2020 . E identidad di e victimanan no a wordo divulga.
E comunidad religioso y pueblo en general a reacciona cu indignacion pa loke ta e revelacion di e abuso y violacionnan cometi pa e pastor den e transcurso di varios aña. Autoridadnan ta insta henter comunidad pa denuncia cualkier forma di abuso y ta subraya e importancia di salvaguardia e bienestar di tur miembro di e comunidad.
E condena di 37 aña di prison pa Armando ‘N’ ta un mensahe fuerte cu ta mustra cu abuso sexual no lo wordo tolera den nos sociedad. Autoridadnan lo sigui traha pa preveni y castiga actonan asina y pa proteha e vulnerable den comunidad.