ORANJESTAD – Prome Minister Evelyn Wever-Croes y Minister Endy Croes a reuni cu Stichting Jantje Beton hunto cu CEDE Aruba. Stichting Jantje Beton, ta un fundacion di Hulanda cu ta traha riba e maneho di e importancia pa e muchanan hunga, pa nan desaroyo social, fisico y mental. Pa yega na e meta aki, Stichting Jantje Beton ta encarga pa sigura cu tin lugarnan accesibel y den bo estado pa e muchanan por hunga.
Prome Minister a indica, cu na aña 2022, el a aserca Stichting Jantje Beton, pa pidi nan yudansa cu e speeltuinnan aki na Aruba. Nan a haci un estudio riba e situacion actual, di e facilidadnan pa muchanan na Aruba por hunga pafo. E resultado di e estudio a wordo presenta na Minister di Asuntonan Social sr Rocco Tjon. A base di e estudio haci, Stichting Jantje Beton, a yega na e punto cu nan lo desea di yuda pais Aruba, trahando dos speeltuin completamente nobo, of drecha uno existente, cu materialnan moderno y mas sigur pa e muchanan. Unabes nan finalisa e estudionan, nan lo informa Gobierno di Aruba, na unda e speeltuinnan aki lo ta situa.
Durante e reunion a bin dilanti tambe, un posibel di tres speeltuin cu nan ta dispuesto pa traha of renoba. Tambe Minister Endy Croes a probecha di menciona e deseo di haya algun veld mas manera esun existente di Johan Kruif. Prome Minister a expresa di ta sumamente orguyoso di e trabou cu Minister di Deporte Endy Croes y Minister di Asuntonan Social Rocco Tjon a bin ta haciendo. Danki na nan esfuerso y dedicacion, awe Aruba tin e compromiso di Stichting Jantje Beton pa traha y/of renoba 3 speeltuin, dunando oportunidad pa nos muchanan por hunga y goza di facilidad nan grandi y moderno.
Gobierno a cuminsa cu e proyecto di Veilige Barios y esaki ta un siguimento pa mehora e calidad di bida di nos barionan na Aruba y nos muchanan. Tambe Stichting Jantje Beton a informa Gobierno di Aruba, cu Postcodelotterij di Hulanda ta duna 1.5 miyon euro pa e 6 speeltuinnan riba e diferente islanan, di cual Aruba ta haya 2 a 3 di nan. Prome Minister a indica cu el a palabra cu di parti di su ministerio, nan lo traha riba un maneho y acuerdo pa por sigui den futuro, haci uzo di nan experticio, pa keda mehora tur e facilidadnan na Aruba, na unda e muchanan ta hunga pafo.
