PONCE: Un noticia cu a capta atencion ta esun caminda ta menciona cu na Puerto Rico a gasta US$2.000 miyon den un terminal di trein hopi moderno mes, pero cu masha tiki hende ta uz’e.
Contrario na ciudadnan manera New York, Amsterdam, London, pa menciona algun, unda for di tempran ta mira miles di persona, mayoria trahado of studiante ta core pa yega puntual na nan lugar di trabao, pues na Puerto Rico, esey no ta e caso, ya cu e terminal di trein di casi bashi.
Ta trata di un plataforma habri, cu murayanan decora pa sculturanan abstracto di diferente color. E ta mustra moderno, limpi. Y cada 12 minuut ta ricibi dos wagon color plata dentro di cual por mira solamente algun pasahero.
E stacion di trein yama Tren Urbano, y e ta ubica na Bayamon, un ciudad di e zona metropolitano pa noord di Puerto Rico. Por mira un security cu ta vigila un luga bashi di hende.
Parce cu e sistema aki di trein no tin nada pa envidia di otro sorto di transporte rond mundo. Su stacionnan ta hopi pareci na otro. Hopi grandi y ta conta cu parkeerplaats cu por ricibi cientos di autonan.
E stacion a wordo inaugura na 2004, pero segun cifranan di gobierno, na 2022, el a ricibi un promedio di 6 pasahero diario.
Un usuario frecuente di e trein a indica cu su construccion no tabata bon planifica pa loke ta e ubicacion di e stacionnan y e coordinacion di e autobusnan.