E estafadornan cibernetico ta dirigiendo nan mes cu tur sorto di estafa (scam) na mas y mas hoben. For di intentonan di ‘phishing’ di nivel abou te cu chantahenan devastador.
E cantidad di hoben cu nan ta purba gaña ta abou compara cu otro grupo di edad, den parti pasobra nan no tin e placa cu lo haci nan obhetivo asina lucrativo.
Segun e Comision Federal di Comercio (FTC) di Merca, cu ta realisa un siguimento di e fraudenan, solamente 5% di e estafanan denuncia na Merca ta afecta personanan di 19 aña of menos.
Aunke e peliger ta menos, inexperensia por transforma e hobennan den un blanco facil. E hobennan cu ta siña di defende nan mes awor por beneficia di e conocemento ey den futuro.
Haya sa unda tin mas risico:
Segun FTC, e tipo di trampa mas comun dirigi na hobennan na 2023 ta e trampa online, e estafa di negoshi impostor y e estafa laboral.
Percura pa investiga e bendedonan cu bo topa den bo buskeda, riba rednan social of riba Amazon, por ehempel. Reconfirma e mensahenan cu ta wordo manda y cu parce di ta zona manera algo oficial.
Cuidao cu e estafanan romantico
Personanan cu ta pretende di ta hende soltero, atractivo, interesa y cu un edad similar na esun di e victima ta manda mensahenan cu e speransa di haya placa, informacion of imagennan priva a cambio cu despues nan ta utilisa pa comete chantahe.
E delincuentenan ta confia cu e hobennan ta bay sinti berguensa di bay pidi ayudo di un persona adulto.
Seguridad di bo Plataformanan
Bo por uza un herment manera 1Password pa asina mantene e passwordnan di bo cuentanan of rednan social safe. Banda di esaki por activa e ‘two-factor authentication’ pa tur bo cuentanan di email, of apps financiero.
Keda bo mes bon informa
Por ehempel, e subreddit di scams riba Reddit ta wordo recomenda pa haya sa di e ultimo tendencianan. AARP tin un ‘fraud hotline’ cu personal real na cual por yama pa haci pregunta.
Den e caso di Aruba, Banco Central of e banconan mes ta duna informacion constantemente riba situacionnan iregular cu ta sosode na Aruba. Por contact nan tambe den caso di duda.