MACUARIMA, ARUBA: E no ta un secreto cu Polis ta core vehiculo policial bou luz blauw y sirena pa yega na un sitio di incidente mas lihe cu ta posibel pa asina por brinda e prome auxilio. Pero pa yega na e sitio di incidente safe e agentenan mester di un training con pa maneha e vehiculo policial aki, ta den cuadro pa sigui eleva e agentenan miho tras di stuur a bin cu e curso di Rijopleiding.
Polis di diferente departamentonan special pero tambe di polis uniform a participa na e curso aki cu a dura tres siman. E curso awordo duna pa instructornan Hulandes: Sr.Geo Prins, Sr.Arno van Blitterswijk y Sr. Eric de Haan.
E agentenan a pasa den varios training practico pero tambe teoretico. A haci uzo di diferente localidad y scenario pa asina e agentenan por maniobra diferente obstaculo den un forma safe y usando diferente vehiculo policial.
30 agente policial a haya e oportunidad pa participa na e curso y a termina esaki exitosamente. Na final e agentenan a haya miho conocimento pa maneha un vehiculo policial y a ricibi un certificado.
Pa altocomisario drs. Ramon Arnhem tabata tres siman di puro siñamento y eleva e calidad di e polis den su trabou diario. No ta solamente e seguridad di e comunidad ta importante pero tambe di e agentenan cu ta tras di stuur y cu mester maneha den forma tactico pa por yega na e sitio sin causa incidente na otro persona. Esaki ta un momento sigur cu cada polis awor tin un conocimento mas den man pa nan sigui amplia nan experticio den e cadena hudicial.
