Oranjestad – Na july di e aña aki a sera un acuerdo den sector di cuido unda a subraya e necesidad y importancia di un “meerjaren financieel kader” pa mantene e fondo di AZV uno sostenibel.
Awe AZV a presenta e plan aki na e zorgveld. E presentacion tawata pa informa con a yega na e meerjaren financieel kader. Uitvoerings Orgaan AZV a indica cu danki na diferente profesionalnan den AZV, como tambe profesionalnan externo cu a traha na esaki. E proyecto aki a wordo monitoria dor di entre otro profesor Jeurissen, cual ta un “Zorg Econoom” di Hulanda. E meerjaren financieel kader ta un modelo cu ta pronostica e costonan di cuido, cual ta tuma na cuenta mas cu un total di 2,500 punto di atencion na momento cu ta calcula e entrada y gastonan di cuido. Danki na e modelo aki cuido di Aruba lo por wordo planea na un miho manera y asina por ehecuta e vision di Minister Oduber y UOAZV pa fortalece e cuido na Aruba y mantene un bon calidad di cuido pa e pueblo actual y nos futuro generacion.
Otro meta di e “meerjaren financieel kader” aki ta pa reemplasa e cortamento di 60 miyon manera cu a wordo stipula dor di Hulanda. Un cortamento di un suma cual Hulanda nunca a argumenta di unda nan yega na dje. Mester bisa tambe cu Aruba nunca tabata di acuerdo cu e cortamento aki.
Minister Dangui Oduber ta sumamente orguyoso di e “meerjaren financieel kader” cual ta algo historico pa Aruba y lo profesionalisa e manera di financia di cuido na Aruba.