ORANJESTAD – Awe mainta Hues di Casonan di Empleadonan di Gobierno (Ambtenarenzaken) a dicta sentencia den e protesta di Guilfred Besaril contra e decision di Gobernador di duna Besaril retiro como castigo diciplinario. Hues den su evaluacion ta haya cu tin tur indicacion cu Besaril den su periodo como Ministro Plenipotenciario no a cumpli cu su deber.
ARUBA NATIVE por a compronde cu di e 18 acusacionnan cu Gobierno a presenta, Hues ta haya cu solamente 4 ta demostra cu Besaril como Minister Plenipotenciario no a cumpli cu su deber.
Ta asina cu 9 Januari 2023, den un Decreto di Gobierno, Gobernador ta informa Besaril cu ta usa articulo 95 di “Landsverordening ambtenarenrecht (La) pa duna e castigo diciplinario cu ta su retiro. Besaril, dia 23 Januari 2023 a bay den protesta di esaki y asina a cuminsa e caso.
18 ACUSACION CONTRA BESARIL
Hues den su evaluacion di e caso a mustra cu e motibo di duna retiro, Gobierno ta mustra cu Besaril a faya hopi den cumpli cu su deber como Minister Plenipotencia. Nan a presenta 18 acusacion contra Besaril:
A. A duna ordennan di pago caminda e ta benefica su mes;
B. A haci gastonan sin tin di haci cu su funcion, a costo di Gobierno;
C. A haci un control di factura hopi malo;
GASTA PLACA DI GOBIERNO DURANTE VIAHENAN PRIVA
D. Durante 14 December 2020 te cu 4 Januari 2021 a malgasta placa di Gobierno;
E. A abusa di su funcion door di duna informacion pa su probecho personal y a paga Divi Village;
F. Riba 9 April 2021 y den e periodo di 17 Mei 2021 te cu 21 September 2021, a malgasta placa di Gobierno;
G. Pa interes personal a cumpra servicio di Elever Strategy and Solution sin cu el a haya un aprobacion pa esaki;
H. A haci uso di servicio VIP na Schiphol pa viahenan priva y vacacion;
I. A declara gastonan di cual un parti tabatin interesnan priva;
MALUSA PLACA DI GOBIERNO DURANTE VIAHE DI TRABAO
J. A laga su mes haya dobble pago di gasto pa viahenan di trabao, door di tabata usa e pinpas di Gobierno ora di come na lugarnan, siendo cu e ta haya placa pa gasta caba y placa pa representacion;
K. A regla servicio VIP pa su famia di Schiphol riba gastonan di Gobierno;
GASTA PLACA DI MAS COMO MINISTER PLENIPOTENCIARIO
L. Den e periodo di 2018 te cu 2021, den forma ineficiente a gasta placanan di Gobierno pa cambia cellularnan cada pasa 2 aña;
M. Sin cu e tabatin permiso, a haci gastonan cu en realidad ta pa uso priva. Na 2018 a cumpra muebles pa cas;
N. Na 2021 a declara factura di compra di muebles pa baby pa asina e haya e placa bek.
O. Desde Mei 2019, via administracion di creditornan a laga restitui placanan di prima di salubridad pa su señora;
P. A desvia di e proceduranan normal cu ta usa ora ta haci un contract di huur;
Q. No a mantene su mes na e proceduranan pa busca ofertanan pa instalacion di alarma na e cas cu e tabata huur;
R. A haci gastonan grandi y innecesario na renovacion di e cas di huur.
Di parti di Gobierno a wordo mustra cu Besaril a abusa di su funcion y autoridad como Ministerio Plenipotenciario pa beneficia su mes financieramente. Gobierno ta haya cu Besaril a demostra cu e no ta sirbi pa e funcion ey y pa bolbe bay traha como Polis no ta posibel.
BESARIL TA DESMENTI
Besaril a desmenti cu e ta culpabel di tur e acusacionnan cu Gobierno a presenta.
SOLAMENTE 4 ACUSACION PROBA
Hues den su evaluacion di e caso, a pasa riba tur e acusacionnan. Hues den mayoria di e acusacionnan, ta haya cu Besaril no ta culpabel di keda sin cumpli cu su deber.
Hues ta haya cu e acusacionnan ariba menciona bao di e letternan D., E., I. y O. si ta proba cu Besaril a faya hopi den cumplimento di su deber y cu esaki ta hustifica e medida diciplinario pa kita Besaril for di trabao.
DECISION
Hues su decision ta cu e ta haya cu e protesta di Besaril no tin base.
Hues ta haya cu Besaril a haci su mes culpabel di keda sin cumpli cu su deber y cu e ta responsabel pa esaki.
Hues ta dicidi cu despues cu e sentencia ta cla, Gobierno por aplica e medida diciplinario di kita Besaril for di trabao.