Home » Heart-Centered Leadership Foundation escogi pa participa den Appeltje van Oranje

Heart-Centered Leadership Foundation escogi pa participa den Appeltje van Oranje

by Admin
0 comment 95 views

Heart-Centered Leadership Foundation (HCLF) ta entre e 10 candidatonan di Caribe
Hulandes cu por gana un prestigioso ‘Appeltje van Oranje’. E tema di e aña aki ta ‘lucha
hunto contra soledad’ y HCLF su iniciativa ‘Heart-Centered Impact Coaches’ a wordo
selecciona como un di candidatonan. Esaki ta e di dos biaha den dos aña cu HCLF lo forma
parti di Appeltje van Oranje despues cu na 2022 a yega te na e ronda final.

Appeltje van Oranje ta un premiacion anual cu ta reconoce iniciativanan den reino hulandes
cu ta haci un diferencia den comunidad. Tur aña ta reconoce y premia 3 iniciativa den e area
social cu ta creativo y unico, cu ta para pa inclusividad y un sociedad involucra.
E tema di e aña aki ta pone enfasis riba iniciativanan cu ta traha hunto pa combati soledad.
HCLF su iniciativa Heart-Centered Impact Coaches ta entre e candidatonan cu a destaca pa
nan esfuerso pa combati soledad entre hobennan. E grupo di ‘coaches’ ta consisti di
hobennan adulto boluntario entre 18 y 30 aña cu ta sigui un trayecto di training y asina ta
sostene hobennan durante diferente actividad interactivo di HCLF.

E fase di hubentud no ta uno facil. Un hoben ta topa hopi retonan den su crecemento cu ta
stroba su formacion completo den un adulto autentico, para firme den su sapoto y cu ta
participa den sociedad. Un di e retonan ta cu hasta si e tin un grupo grandi di amistad, un
hoben por sintie completamente su so. E sentimento di soledad por causa retonan cu salud
mental. Pa e hoben cu ta sintie solitario, sin yun hende pa conecta, e coaches ta dunanan
atencion y un orea pa scucha sin cu nan wordo husga.

E diferencia di e iniciativa ta e conexion cu e Heart-Centered Impact Coaches ta crea cu
hobennan y pa nan mes como hoben adulto. Cu hobennan, nan ta percura pa un espacio
sigur pa expresion propio y un ambiente inclusivo pa sostene otro. Pa nan mes como hoben
adulto, nan ta conoce otro boluntario cu ta comparti mesun proposito of meta, forma
conexion, intercambia experiencia y oportunidad y motiva otro pa ta e miho version di nan
mes. Un ehempel di nan motivacion y conexion ta con nan ta bin cu actividad pa hoben y pa
nan mes, manera un ‘mindfulness hike’ y un sesion di crecemento personal pa hoben.
Heart-Centered Impact Coaches tabata presente den mas di 30 sesionann pa hoben,
yudando HCLF alcansa 400 hoben cu su programanan den aña 2023. Den e prome 4
lunanan di 2024, e Heart-Centered Impact Coaches ya a conecta cu hoben durante 20
sesion.

HCLF ta entusiasma cu su iniciativa ta considera pa e premio di Appeltje van Oranje. E ta un
reconocemento di e trabao valioso cu e fundacion y su Heart-Centered Impact Coaches ta
haci pa combati soledad entre hobennan. HCLF ta confia cu e trabao cu su Heart-Centered
Impact Coaches ta haci ta yuda crea un comunidad mas conecta y inclusivo, caminda cu
cada hoben ta sinti su mes valioso y empodera.

HCLF ta haci un yamada na pueblo di Aruba pa keda pendiente pa e ronda di votacion cu lo
tuma luga di 22 pa 31 di mei proximo, unda HCLF tin e chance pa sigui pa e ronda di 10
nominadonan cu por gana un Appeltje van Oranje. E 3 ganadornan ta ricibi un estatua brons
chikito diseña door di Princess Beatrix y tambe un premio cash na balor di €25,000. E
premionan ta wordo otorga door di Reina Maxima na palacio Noordeinde na Hulanda.
Pa vota por click akinan: https://stem.oranjefonds.nl/heartcenteredimpactcoaches
Pa mas informacion of pregunta tocante votacion, por tuma contacto cu e fundacion via
whatsapp na 5841211. Por bishita Heart-Centered Leadership Foundation su facebook page
tambe pa e link directo pa vota.

Tocante HCLF:
Heart-Centered Leadership Foundation (HCLF) ta un fundacion cu a keda estableci na 2008
cu e meta pa inspira y empodera hobennan di Aruba. Desde 2012 e fundacion ta ofrece
diferente tayer, actividad y seminario unda hobennan ta haya oportunidad pa desaroya nan
caracter y habilidadnan cu ta fortifica nan desoroyo personal y profesional.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio